„სოლიდარობა პანკისს“ - აქტივისტებმა მხარდასაჭერი აქცია ბათუმში გამართეს

პანკისის ხეობის ადგილობრივი მოსახლეობის მხარდასაჭერად ბათუმელი აქტივისტები ევროპის მოედანზე შეიკრიბნენ.


„სისტემა მოძალადეა“ „არა ჰესებს“ „აჭარა თქვენთანაა“ - ამ შინაარსის წარწერებით აქტივისტები ერთი საათის განმავლობაში იდგნენ მოედანზე, რითაც, ერთი მხრივ, სოლიდარობა გამოუცხადეს პანკისში მცხოვრებ მოსახლეობას, რომელიც ხეობაში ჰიდროელექტროსადგურის მშენებლობას აპროტესტებს. მეორე მხრივ, კი დაგმეს პოლიციის ქმედებები, რაც, მათივე თქმით, იყო ძალადობრივი. სოლიდარობის საპროტესტო აქცია სოციალურ ქსელში დაგეგმა ბათუმელმა აქტივისტმა მარიამ მუთიძემ:


„არ უღირთ ადამიანებს ჰესის მშენებლობა და ბუნებრივია, უარი განაცხადეს, პროტესტი გამოთქვეს. ჩვენი ქვეყანა არის მოსახლეობისთვის და არა ფულიანი ადამიანების გამდიდრებისთვის. როცა ადამიანები ამბობენ, რომ არ უნდათ ჰესი ამ მოთხოვნის ძალადობრივი გზით ჩახშობით ჩვენ ვერ ავაშენებთ ქვეყანას“, - თქვა მარიამ მუთიძემ.




პანკისელებს სოლიდარობა გამოუცხადა მოძრაობამ „სიტყვის კაცები“, რომლის წევრებიც მაჭახელის ხეობაში ჰესის მშენებლობას ეწინააღმდეგებიან. ისინი პანკისში გამგზავრებას გეგმავდნენ, თუმცა შემდეგ ბათუმში სოლიდარობის აქციას შეუერთდნენ:


„ჩვენ ეს პროცესები გავიარეთ. ჰესის მშენებელმა კომპანიამ გადაწყვიტა, რომ პოლიცია შემოეყვანა მაჭახელის ხეობაში და ძალადობის გზით ცდილობდა სამუშაოს დაწყებას. მაგრამ პოლიციასთან კომუნიკაციამ და გონიერებამ ეს პროცესი ჩვენ მშვიდობიანად გადაგვალახინა. ჩვენთვის ყოველგვარი ძალადობა მიუღებელია. ასეთი ძალადობით, დაშინებითა და შანტაჟით ყველანაირი პროექტების განხორციელება მიუღებელია, მით უმეტეს ისეთი პროექტები, რომლებიც აზიანებს ადგილობრივ მოსახლეობას. ჩვენ ვუერთდებით პანკისელების პროტესტს და იმედს გამოვთქვამთ, რომ მთავრობის წარმომადგენლებსა და ადგილობრივ მოსახლეობას შორის მოლაპარაკება მშვიდობიანად დასრულდება და სიტუაცია განიმუხტება. ძალადობით არანაირი ჰიდროელექტოსადგური საქართველოში არ აშენდება!“ - ამბობს მაჭახელის მკვიდრი როინ მალაყმაძე.