პრეზიდენტმა პეტრო პოროშენკომ ოლიმპიურ სტადიონზე 19 აპრილს გამართული დებატების დროს, ოპონენტ ვოლოდიმირ ზელენსკის განუმარტა, თუ რაში მდგომარეობს კორუფციის წინააღმდეგ ბრძოლის მისეული სტრატეგია და რატომ „არ აჭრის ხელს“ კორუმპირებულებს.
"მე არც ჯალათი ვარ და არც - მოსამართლე. პრეზიდენტი ქმნის აუცილებელ პირობებს სამართლიანი სასამართლოსთვის, საგამოძიებო ორგანოსათვის,სამართლიანი და მიუკერძოებელი გამოძიებისათვის. და მე ვაკეთებდი და გავაკეთებ ყველაფერს, რაც ჩემზეა დამოკიდებული“, - განაცხადა პეტრო პოროშენკომ და დასძინა, რომ არც ერთ მის მეგობარს არ აქვს და არც მომავალში ექნება რაიმე კავშირი კორუფციასთან.
თავის მხრივ პოროშენკომ საპასუხო შეკითხვა დაუსვა ზელენსკის ოლიგარქ იგორ კოლომისკისთან მის სავარაუდო კავშირებზე.
„თქვენმა ბიზნესპარტნიორმა „პრივატბანკის“ ანგარიშიდან 41 მილიონი დოლარი გადაგიხადათ პირადად თქვენ, საიდუმლო ოფშორულ ანგარიშებზე. როგორ ართმევთ მას ხელს და მოაჭრით თუ არა მას ხელს?“ - ამ შეკითხვაზე ზელენსკის პასუხი არ გაუცია, რადგან ეს იყო პოროშენკოს პასუხი ოპონენტის შეკითხვაზე.
კიევის „ოლიმპიურ“ სტადიონზე პრეზიდენტობის კანდიდატებმა ერთმანეთს დაუსვეს სამ-სამი შეკითხვა, რომლისთვისაც მათ ჰქონდათ თითო-თითო წუთი, პასუხისათვის - 4 წუთი. დებატების დასაწყისში და ბოლოს კანდიდატებმა ისარგებლეს ასევე განცხადებებისთვის განკუთვნილი ხუთ-ხუთი წუთით.
საპრეზიდენტო არჩევნების მეორე ტური უკრაინაში 21 აპრილს გაიმართება.
