ბელორუსის პრეზიდენტი ალექსანდრ ლუკაშენკო აცხადებს, რომ მის ქვეყანას არ ემუქრება ის, რომ სადმე „წაიღებენ“ და „გაიყოფენ“. მან „როშვა“ უწოდა მითქმა-მოთქმას იმაზე, რომ ბელორუსს ემუქრება სუვერენიტეტის დაკარგვა. „შეუძლებელია ამის გაკეთება, რადგან უკვე დაიბადნენ თავისუფალი და დამოუკიდებელი ბელორუსები“, - განაცხადა ლუკაშენკომ პარლამენტის წინაშე ყოველწლიური მიმართვით გამოსვლის დროს.
თავის წინა გამოსვლებისგან განსხვავებით ლუკაშენკოს 19 აპრილს პირდაპირ აღარ ულაპარაკია რუსეთზე. მან აქცენტი გააკეთა ქვეყნის შიდა პრობლემებზე, სოფლის მეურნეობაზე და მოუწოდა მთავრობას, რომ შეაჩეროს ფასების ზრდა. „გაერთნენ დემოკრატიით და საბაზრო ეკონომიკით“, - განაცხადა ბელორუსის ლიდერმა.
ლუკაშენკო გამოვიდა როგორც ბელორუსული ენის, ისე რუსული ენის მხარდაჭერის მოწოდებით. მისი აზრით, რუსულ ენაზე უარის თქმა, ნიშნავს უარის თქმას გონებაზე, ბელორუსულ ენაზე უარის თქმა კი - გულზე უარის თქმას.
ყოველწლიურ მიმართვაში ლუკაშენკო შეეხო არჩევნების საკითხსაც და განაცხადა, რომ არ აპირებს საპრეზიდენტო არჩევნების თარიღის გადატანას და იგი ჩატარდება 2020 წელს. ხოლო საპარლამენტო არჩევნები გაიამრთება მიმდინარე წლის შემოდგომაზე.
