ბელორუსიის პრეზიდენტმა ალექსანდრ ლუკაშენკომ რუს კოლეგას საახალწლოდ აჩუქა თავის ბოსტანში მოყვანილი ოთხი ტომარა კარტოფილი და სალა, ღორის ქონი.
ამის შესახებ განაცხადა ლუკაშენკოს პრეს-მდივანმა ნატალია ეისმონტმა. მისი თქმით, საქმე ეხება კარტოფილის „ელიტურ“ ჯიშებს. არაფერს იუწყებიან იმაზე, თუ, თავის მხრივ, პუტინმა რა აჩუქა ლუკაშენკოს.
დამოუკიდებელ სახელმწიფოთა თანამეგობრობის დანარჩენ ლიდერებს ლუკაშენკომ, ცნობების თანახმად, ნაძვის ხის ხელნაკეთი სათამაშოები დაურიგა.
პუტინისთვის განკუთვნილ საჩუქარზე ცნობილი გახდა 29 დეკემბერს მოსკოვში ორი პრეზიდენტის შეხვედრის - ერთ კვირაში უკვე მეორე შეხვედრის - შემდეგ. 29 დეკემბერს მათ სამ საათზე მეტი ისაუბრეს, მაგრამ, ისევე როგორც წინა შეხვედრის შემთხვევაში, შედეგებზე არაფერი თქმულა.
ლუკაშენკოსთან შეხვედრის შემდეგ პუტინი გაემართა წითელ მოედანზე, სადაც მონაწილეობა მიიღო ჰოკეის მატჩში. მან თქვა, რომ ლუკაშენკოც დაპატიჟა, მაგრამ ბელორუსიის პრეზიდენტმა მინსკში დაბრუნება არჩია წინასაახალწლო საქმეების გამო.
პუტინისა და ლუკაშენკოს შეხვედრების ფონს ქმნის განცხადებები, რომლებიც ორმხრივ ურთიერთობაში დაძაბულობაზე მიანიშნებს. წლის განმავლობაში ლუკაშენკომ არაერთხელ მიანიშნა რუსეთის მხრიდან ზეწოლაზე, ხოლო დეკემბერში პირდაპირ თქვა, რომ მოსკოვი ბელორუსიას, ფაქტიურად, სუვერენიტეტზე უარისაკენ უბიძგებს.
მეორე მხრივ, მოსკოვი აცხადებს, რომ ბელორუსია მოითხოვს სავაჭრო პრივილეგების უსაფუძვლოდ შენარჩუნებას. პირადად პუტინმა კი თქვა, რომ საჭიროა დაბრუნება სამოკავშირეო ხელშეკრულების შესრულების საკითხთან. ეს ხელშეკრულება ითვალისწინებს ბელორუსიისა და რუსეთის მჭიდრო ინტეგრაციას.
