უკრაინაში აშშ-ის საგანგებო წარმომადგენლის, კურტ ვოლკერის განცხადებით, იდეა, რომ რუსეთს დამატებითი სანქციები უნდა დაეწესოს გასულ თვეში შავ ზღვაზე მომხდარი დაპირისპირების გამო, მხარდაჭერას იკრებს. ვოლკერი ამ განცხადებებით გამოვიდა ბრიუსელში, ინტერნეტით გამართულ ბრიფინგზე 17 დეკემბერს, მას შემდეგ, რაც რუსეთმა დააკავა უკრაინის სამი სამხედრო ხომალდი და 24 მეზღვაური ქერჩის სრუტესთან, რომელიც ერთმანეთთან აკავშირებს შავ ზღვას და აზოვის ზღვას. 25 ნოემბრის ინციდენტმა გამოიწვია რეგიონში დაძაბულობის ესკალაცია და საერთაშორისო მოწოდებები მეზღვაურების გათავისუფლების შესახებ. რუსეთი ამბობს, რომ ხომალდები უკანონოდ შევიდნენ რუსეთის ტერიტორიულ წყლებში, ყირიმის რეგიონთან ახლოს, რომლის უკრაინისგან ანექსირებაც რუსეთმა 2014 წლის მარტში მოახდინა. კიევი მოსკოვს ადანაშაულებს "აგრესიის" გაზრდაში უკრაინის წინააღმდეგ. ვოლკერმა ჟურნალისტებს უთხრა, რომ ევროპაში "იდეა, რომ საჭიროა პასუხის გაცემა და დამატებითი სანქციები, ისევე, როგორც სახელების დასახელება, გარკვეულ მხარდაჭერას იკრებს". ვოლკერმა დასძინა, არ გამიკვირდება ეს რომ მომავალი ორი თვის განმავლობაში მოხდესო.
