აშშ-ის სენატის სადაზვერვო კომიტეტის ანგარიშის თანახმად, რუსეთის მხრიდან სოციალურ მედიაში წარმოებული საინფორმაციო კამპანიის მიზანი იყო ამერიკულ საზოგადოებაში კონფლიქტის გაღრმავება და დემოკრატი ამომრჩევლების აქტივობის შემცირება 2016 წლის საპრეზიდენტო არჩევნებზე. ანგარიში შედგენილია აშშ-ში განთავსებული კიბერუსაფრთხოების კომპანიის, New Knowledge-ის მიერ, რომელიც დაეყრდნო სენატისთვის მიწოდებულ ინფორმაციას ფეისბუკის, ტვიტერის და გუგლის მშობელი კომპანიის, ალფაბეტის მიერ. დოკუმენტის თანახმად, დეზინფორმაციის კამპანიას სათავეში ედგა სანკტ-პეტერბურგის კომპანია, "ინტერნეტის კვლევის სააგენტო" (IRA), რომელსაც აშშ-ის სადაზვერვო კომიტეტი უწოდებს ტროლების ფაბრიკას, კავშირებით რუსეთის მთავრობასთან. კამპანიის მიზანი იყო ამომრჩევლებს შორის კონფლიქტის გაღრმავება მტკივნეულ საკითხებზე, მათ შორის იმიგრაციაზე, რასობრივ საკითხებზე და იარაღის კონტროლზე - და დონალდ ტრამპის დახმარება 2016 წლის არჩევნებში გასამარჯვებლად. "რამდენიმე პლატფორმაზე გრძელდება ჩარევის აქტიური და მიმდინარე ოპერაციები" - ვკითხულობთ ანგარიშში. ავტორების თანახმად, რუსეთის მიერ წარმოებული ერთ-ერთი კამპანია მიზნად ისახავს საზოგადოებრივ აზრზე გავლენის მოხდენას სორიის საკითხზე, სირისი სამოქალაქო ომში რუსეთის მოკავშირის, პრეზიდენტ ბაშარ ალ-ასადის სასარგებლოდ.