გორში მომხდარი შემთხვევის შემდეგ შინაგან საქმეთა სამინისტრომ გამოძიება სისხლის სამართლის კოდექსის ორი მუხლით დაიწყო. დღეს გორში, სამეფოს ქუჩაზე მდებარე ერთ-ერთ სახლში, ერთი ახალგაზრდა მამაკაცი დაიღუპა, მისი ორი მეზობელი კი ინტოქსიკაციის ნიშნებით გორის ჰოსპიტალში გადაიყვანეს. სამართალდამცავებმა თავიდან რამდენიმე ვერსიაზე დაიწყეს მუშაობა, განიხილებოდა ბუნებრივი აირით ინტოქსიკაციის შემთხვევა, თუმცა მოგვიანებით ეს ვერსია გამოირიცხა. ამჟამად გამოძიება ახალგაზრდების მიერ კუსტარულად დამზადებული ნარკოტიკული ნივთიერების მოხმარების თაობაზე მუშაობს. ექსპერტიზის დასკვნა ჯერ ცნობილი არ არის. სისხლის სამართლის საქმე ორი მუხლით არის აღძრული: 115-ე მუხლით, რაც თვითმკვლელობამდე მიყვანას გულისხმობს, და 273- ე მუხლით, რაც პირადი მოხმარებისთვის ნარკოტიკული საშუალების, მისი ანალოგის უკანონოდ დამზადება-შეძენა-შენახვას გულისხმობს.