აშშ-მა განაცხადა, რომ „განსაკუთრებული“ გაფრენა განახორციელა უკრაინის თავზე სამხედრო მეთვალყურეობის შესახებ საერთაშორისო ხელშეკრულების შესაბამისად. ეს შეთანხმება, სახელწოდებით, „ღია ცის ხელშეკრულება“, 1992 წელს გაფორმდა ეუთოს წევრების მიერ და მონაწილე ქვეყნებს ერთმანეთის საჰაერო სივრცეში ფრენის და სამეთვალყურეო ქმედების განხორციელებს უფლებას აძლევს. აშშ-ის თანახმად, 6 დეკემბრის ფრენა განხორციელდა „რუსეთის მზარდი პროვოკაციული და სახიფათო ქმედებების“საპასუხოდ, როგორც პენტაგონი იტყობინება, რუსეთსა და უკრაინას შორის გასულ თვეში ზღვაზე მომხდარი დაპირისპირების გამო დაძაბულობის ფონზე. „სი-ენ-ენი“ იტყობინებოდა, რომ აშშ გეგმავს შავ ზღვაში სამხედრო გემის შეყვანას, მაგრამ ეს ცნობა არ დაუდასტურებიათ. უკრაინის სამთავრობო ჯარი აღმოსავლელ სეპარატისტებთან ომს აწარმოებს 2014 წლიდან. რუსეთმა ანექსია გაუკეთა უკრაინის ტერიტორიას, ყირიმის ნახევარკუნძულს იმავე წელს. ვითარება კიევსა და მოსკოვს შორის გამწვავდა ქერჩის სრუტის ინციდენტის დროს, როცა რუსეთის სასაზღვრო დაცვამ ცეცხლი გაუხსნა, შემდეგ კი დააკავა უკრაინის სამი გემი და 24 მეზღვაური. აშშ-ის თავდაცვის უწყების თანახმად, აშშ-მა და მისმა მოკავშირეებმა განახორციელეს „განსაკუთრებული“, ანუ დაუგეგმავი გაფრენა. „ღია ცის ხელშეკრულება“ 34 ხელის მომწერ სახელმწიფოს ნებას რთავს მეთვალყურეობა გაუწიონ ერთმანეთს და ასეთი გაფრენები წინასწარ თანხმდება ორ ქვეყანას შორის. ხელშეკრულება წევრებს ნებას რთავს, მიმართონ „განსაკუთრებულ“ გაფრენას, თუ შესაბამისი ქვეყანა თანახმაა. ამ შემთხვევაში მორიგება მოხდა უკრაინასა და აშშ-ს შორის. პენტაგონი აცხადებს, რომ აშშ-ს რუსეთთან უკეთესი ურთიერთობა სურს, მაგრამ „ვერ დაუშვებს უკანონო და მადესტაბილიზებელ ქმედებებს უკრაინაში და სხვაგან“. აშშ-ის სამეთვალყურეო საფრენი აპარატები რეგულარულად უთვალთვალებენ შავ ზღვაში სანაპირო ზოლს, ყირიმის ჩათვლით. რუსეთის სამხედრო თვითმფრინავები რეგულარულად ეღობებიან და უთვალთვალებენ სამეთვალყურეო აპარატებს.
