ირანის ოფიციალურ პირთა თანახმად, ორი პოლიციელი იქნა მოკლული თვითმკვლელის მიერ ჩაბაჰარში, პოლიციის შენობის შესასვლელთან. ჩაბაჰარის გუბერნატორის მოვალეობის შემსრულებელმა, რაჰმდელ ბამერიმ ასევე დაადასტურა მედიის მიერ გავრცელებული ინფორმაცია, რომ 6 დეკემბერს, მანქანაში ჩამონტაჟებული ბომბის აფეთქებას ორი ადამიანი ემსხვერპლა. ადრე იტყობინებოდნენ, რომ სამი ადამიანი დაიხოცა და ოცამდე დაშავადა ამ აფეთქების დროს. ბამერიმ სააგენტო ირნას უთხრა, რომ „ტერორისტებმა ბომბი ააფეთქეს მანქანაში პოლიციის შენობის შესასვლელთან“. მოჰამად მარაშიმ, რომელიც უშიშროების სფეროში გუბერნატორის მოადგილეა, თქვა, რომ თავდამსხმელები ლამობდნენ პოლიციის ტერიტორიაზე შეჭრას, მაგრამ გუშაგებმა გზა გადაუღობეს, რასაც მოჰყვა აფეთქება. სახელმწიფო ტელევიზია იტყობინებოდა სროლის შესახებ აფეთქების შემდეგ. ინტერნეტით გავრცელებულ განცხადებაში, სუნიტი ჯიჰადისტების ჯგუფმა, ანსარ ალ-ფურყანმა იკისრა აფეთქებისთვის პასუხისმგებლობა. ამის თაობაზე გავრცელა ცნობა ვაშინგტონში დაფუძნებულმა „SITE Intelligence Group“-მა, რომელიც ექსტრემისტების მოქმედებას ადევნებს თვალყურს. ირანის საგარეო საქმეთა მინისტრმა მოჰამად ჯავად ზარიფმა ტვიტერით განაცხადა, რომ ამ თავდასხმის უკან უცხო სახელმწიფოები დგანან, და რომ დამნაშავეები მართლმსაჯულების წინაშე წარდგებიან. ტერორისტული თავდასხმები ირანში იშვიათი მოვლენაა.
