საქართველოს არჩეული პრეზიდენტი სალომე ზურაბიშვილი „სადა“, „ევროპული ფორმის“ ინაუგურაციას ისურვებდა - ამის შესახებ მან 6 დეკემბერს განუცხადა ჟურნალისტებს. ამ ეტაპზე მისთვის უცნობია სავარაუდო სცენარები.
„დღეს ან ხვალ უნდა გამაცნონ, რა ვარიანტები არსებობს ამ სცენარების. მე მომხრე ვარ რაც შეიძლება სადა სცენარის, რასაც მე ვთვლი როგორც ევროპულ ფორმას“, - განაცხადა სალომე ზურაბიშვილმა.
არჩეულმა პრეზიდენტმა ჯერჯერობით არ იცის, რომელ ქვეყანათა ლიდერები ჩამოვლენ საქართველოში ინაუგურაციისთვის, მაგრამ იმედოვნებს, რომ სტუმრებს შორის ქალები იქნებიან. „საგარეოს პროტოკოლი აგზავნის ყველა იმ ქვეყნის პირველ პირებთან, რომლებიც არიან ჩვენი პარტნიორები, რომლებიც არიან აკრედიტებული. ეს არ ნიშნავს, რომ ყველა ჩამოვა. ჩვენ ძალიან ცოტა დრო გვაქვს ამისთვის, მაგრამ იმედი მაქვს, რომ თუნდაც ქალთა წარმომადგენლობა იქნება შესატყვისი იმ ფაქტის, რომ საქართველომ აირჩია პირველად ქალი პრეზიდენტი“, - უთხრა ჟურნალისტებს სალომე ზურაბიშვილმა.
