რუსეთის მიერ ანექსირებულ ყირიმში ექსტრემიზმის წინააღმდეგ ბრძოლის ცენტრის თანამშრომლებმა დააკავეს ადვოკატი ემილ კურბედინოვი, რომელიც სასამართლოში წარმოადგენს ყირიმელი თათარი აქტივისტების ინტერესებს. ამის შესახებ რადიო თავისუფლების კორესპონდენტი იტყობინება.
კურბედინოვი ეჭვმიტანილია სოცქსელებში აკრძალული ორგანიზაციის სიმბოლიკის გამოქვეყნებაში. ადვოკატი სახლიდან სამსახურში მიდიოდა, როცა პოლიციელებმა დააკავეს და მიიყვანეს სევასტოპოლში, ყირიმის შინაგან საქმეთა სამინისტროს სამმართველოში. იქიდან მან დაურეკა კოლეგას, რომელიც იურიდიული დახმარების აღმოსაჩენად გაემგზავრა მასთან.
ნოემბრის დამდეგს კურბედინოვი გააფრთხილეს ექსტრემისტული საქმიანობის დაუშვებლობის თაობაზე. თავად ადვოკატი ხელისუფლების მოქმედებებს უკანონოდ მიიჩნევს.
