უკრაინის პრეზიდენტმა პეტრო პოროშენკომ გერმანიასა და მის მოკავშირეებს მოუწოდა, გაზარდონ თავიანთი სამხედრო ყოფნა შავ ზღვაში. პოროშენკოს აზრით, ასეთი ნაბიჯი შესაძლებელს გახდის რეგიონში რუსეთის შეკავებას. ამის შესახებ მან განაცხადა მედიაჯგუფ „ფუნკესთან“ ინტერვიუში, რომლის ნაწყვეტების თარგმანი პრეზიდენტის ადმინისტრაციის საიტზე გამოქვეყნდა.
იქვე პოროშენკო დასავლეთს მოუწოდებს, დაბლოკოს გაზსადენ „ჩრდილოეთის ნაკადი-2“-ის მშენებლობა და დააწესოს ახალი სანქციები რუსეთის წინააღმდეგ.
ხოლო იტალიის გამოცემა „კორიერე დელა სერასთან“ ინტერვიუში, ის ითხოვს რუსეთის ხომალდებისათვის ევროპის ნავსადგურების ჩაკეტვას და უკრაინის სამხედრო, პოლიტიკურ და ეკონომიკურ მხარდაჭერას.
უკრაინის პრეზიდენტი ევროპის ქვეყნებს მადლობას უხდის კიევთან სოლიდარობისათვის. მისივე აზრით, რუსეთის პრეზიდენტთან დაახლოების ნებისმიერი მცდელობა მხოლოდ უბიძგებს მას მსოფლიო წესრიგზე, თავისუფლებაზე, ევროპული დემოკრატიის ფასეულობებზე მორიგი თავდასხმებისაკენ.