ამ დროისთვის ქუთაისში ქარის სიჩქარემ იკლო, თუმცა არამდგრადი ამინდი ნარჩუნდება. საგანგებო სიტუაციების მართვის სამსახურის ინფორმაციით, გასულ ღამით, ძლიერი ქარის გამო, იმერეთის მუნიციპალიტეტებიდან 350-მდე შეტყობინება შევიდა და მათი დიდი ნაწილი ქუთაისიდან იყო. სამსახურის მონაცემებით, ძლიერმა ქარმა ქალაქში წააქცია 130 წლის ხე, დააზიანა 5 ავტომანქანა და სახურავი ნაწილობრივ ან მთლიანად დაუზიანა 150-მდე საჯარო თუ კერძო საცხოვრებელ სახლს და მრავალბინიან კორპუსს.
„საქართველოს რკინიგზის“ინფორმაციით, დასავლეთ საქართველოში ძლიერმა ქარმა საქართველოს რკინიგზის ზოგიერთ მონაკვეთზე ელექტრომომარაგების სისტემა დააზიანა, რის გამოც მატარებლებმა დაგვიანებით შეასრულეს გრაფიკით გათვალისწინებული რეისები. შექმნილი შეფერხებების აღმოფხვრისთვის „საქართველოს რკინიგზის“ ყველა შესაბამისი სამსახური მუშაობის განსაკუთრებულ რეჟიმზეა გადასული.
მეორე დღეა, ძლიერი ქარისა და უამინდობის გამო ქუთაისის საერთაშორისო აეროპორტი საგანგებო რეჟიმით მუშაობს. ამ დროისთვის საჰაერო ფრენები აღდგენილია ქუთაისის აეროპორტიდან. "საქართველოს აეროპორტების გაერთიანება“ გავრცელებულ განცხადებაში მადლობას უხდის ქუთაისის საერთაშორისო აეროპორტის თანამშრომლებს და ავიაკომპანია Wizz air-ს ფორსმაჟორულ ვითარებაში ნაყოფიერი თანამშრომლობისთვის.
ძლიერმა ქარმა, ასევე დააზიანა ელექტროგადამცემი ხაზები და ბოძები, რის გამოც ელექტრომომარაგება ამ დრომდე შეწყვეტილი აქვს აბონენტების ნაწილს. როგორც „ენერგო-პროჯორჯიას“ ადგილობრივ ფილიალში განმარტავენ, ელექტროენერგია არ მიეწოდება რამდენიმე დასახლების ნაწილს.
საგანგებო რეჟიმით მუშაობს ქუთაისის მერიის სამსახურებიც, როგორც მერიის საბინაო ინფრასტრუქტურის მართვის და განვითარების სამსახურის ხელმძღვანელი ჯონი არაბიძე განმარტავს, ძლიერმა ქარმა განსაკუთრებული პრობლემები შექმნა და დიდი ზიანი მიაყენა ქალაქის იმ უბნებში მცხოვრებ მოსახლეობას, რომლებიც ძლიერი ქარის ზონებშია, ჯონი არაბიძის ინფორმაციით, სახურავის გარეშე დარჩა ათეულობით სახლი და კორპუსი. როგორც მერიაში განმარტავენ, ზარალის დათვლა ქარის ჩადგომის შემდეგ დაიწყება.