„ალბათ, სახიფათოც კია გავაკეთოთ რეაქცია, მაგრამ რამდენადაც ეს ჩვენი შიდა კვლევა აღარ გახლდათ, უცხოური კომპანია მოვიწვიეთ, თანაც ჩვენი კონკურენტის მიერ დაქირავებული კომპანიაც აცხადებს ეგზიტპოლებს, შესაძლებელია უკვე გავაკეთოთ რეაქცია შესატყვისი და მადლობა გადავუხადოთ ჩვენ ამომრჩევლებს და მთლიანად საზოგადოებას“ - ამის შესახებ „ქართული ოცნების“ ოფისში განაცხადა პარტიის თავმჯდომარემ ბიძინა ივანიშვილმა მას შემდეგ, რაც ტელეკომპანიებმა „იმედმა“ და „რუსთავი 2“-მა გამოაქვეყნეს ეგზიტპოლის შედეგები. მათი წინასწარი შედეგებით, საპრეზიდენტო არჩევნებში სალომე ზურაბიშვილი იმარჯვებს.
ბიძინა ივანიშვილის შეფასებით, არჩევნების პირველი და მეორე ტურის შედეგებმა და ზოგადად, ბოლო თვეების განმავლობაში განვითარებულმა მოვლენებმა აჩვენა, რომ საზოგადოებამ გააცნობიერა საკუთარი ძალა, კარგად გაიგო, რომ მის ხელშია ბერკეტები და ადეკვატური რეაქცია გააკეთა. „მეც მინდა საზოგადოების ნაწილად წარმოვაჩინო თავი და ვთქვა, რომ მეც ვიგრძენი ის, რაც იგრძნო საზოგადოებამ“ - განაცხადა ივანიშვილმა. მისი თქმით, გააკეთა შესაბამისი დასკვნები და რეაქცია გააკეთა „ქართული ოცნების“ გუნდმაც.
„მინდა საზოგადოებას მადლობა გადავუხადო ასეთი გრძნობადობისთვის, ესეთი რეაქციისთვის. დანარჩენი ალბათ, ჩემზეა. რასაც გაგპირდით ყველაფერს გავაკეთებ, მაქსიმუმს შევცდები და გაჩვენებთ, რომ გეყოლებათ ხელისუფლება, რომელიც იქნება თქვენ სამსახურში და გავამართლოთ ის, რაც დღეს მივიღეთ" - განაცხადა ბიძინა ივანიშვილმა.
