ინსტაგრამში განავითარეს ტექნოლოგიური ინსტრუმენტები, რომლებიც ისეთ მომხმარებლებს გამოავლენს, ვინც მასალის ან გვერდის ცნობადობის ასამაღლებლად უკანონო გზებს მიმართავს.
ინსტაგრამის ნებისმიერი მფლობელი, რომელიც დაარღვევს კომპანიის შინაგანაწესს, მიიღებს გაფრთხილებას და პაროლის გამოცვლის მოთხოვნას.
„ჩვენ წავშლით გვერდების ყალბ გამომწერებს, მოწონებებსა და კომენტარებს, რომლებიც მიღებულია დამატებითი აპლიკაციების გამოყენებით, იმისთვის რომ გაიზარდოს კონკრეტული გვერდის პოპულარობა. ჩვენ ასევე ვიცით, რომ ზოგიერთი მომხმარებელი გაუაზრებლად უზიარებს თავის პირად მონაცემებს სხვა გარე აპლიკაციებს, ამიტომ, თუკი თქვენ მიიღეთ შეტყობინება, უბრალოდ, შეცვალეთ პაროლი, რათა აღარ იყოს თქვენი პირადი ინფორმაცია ხელმისაწვდომი სხვისთვის“.
მას შემდეგ, რაც 2010 წელს ინსტაგრამი ონლაინსივრცეში გამოჩნდა, არაერთი მომხმარებელი ცდილობს გამომწერების რაოდენობის გაზრდას და თავიანთ პროდუქტზე ფინანსური სარგებლის მიღებას. კომპანიას სურს დაიცვას ინსტაგრამსივრცე დეზინფორმაციის, ყალბი მომხმარებლებისა და თაღლითური საქმიანობისგან.
ინსტაგრამი ფეისბუკმა 2012 წელს შეიძინა 1 მილიარდ დოლარად, მიმდინარე წელს კი მისი მომხმარებლების რაოდენობა მილიარდს გასცდა.
ინსტაგრამი აანონსებს, რომ უახლოეს კვირებში მომხმარებლებს დამატებით განახლებებს შესთავაზებს იმისათვის, რომ ინსტაგრამზე არ გაგრძელდეს არაავთენტიკური აქტივობა.
