რუსეთმა სანქციები შემოიღო უკრაინის 322 მოქალაქისა და 68 კომპანიის წინააღმდეგ. შესაბამის ბრძანებულებას ხუთშაბათს მოაწერა ხელი რუსეთის პრემიერ-მინისტრმა დმიტრი მედვედევმა. სანქციების სიაში მოხვდნენ მინისტრები, მათ შორის უკრაინის შინაგან საქმეთა მინისტრი არსენ ავაკოვი, დეპუტატები და ბიზნესის წარმომადგენლები. რუსეთის სანქციები გავრცელდება ყოფილ პრემიერ-მინისტრებზე, იულია ტიმოშენკოზე და არსენი იაცენიუკზე, უკრაინის პრეზიდენტ პეტრო პოროშენკოს ვაჟზე, ალექსეიზე, და აშშ-ში უკრაინის ელჩზე, ვალერი ჩალიზე. მედვედევმა მთავრობას დაავალა იმ ფიზიკური და იურიდიული პირების სიის მომზადება, რომლებზეც გავრცელდება სანქციები, ასევე თავად შემზღუდავი ზომების განსაზღვრა.