აშშ-ის საიდუმლო სამსახური აცხადებს, რომ აღმოჩენილია სავარაუდო ასაფეთქებელი მოწყობილობები, რომლებიც გაგზავნილი იყო ყოფილ პრეზიდენტ ბარაკ ობამასა და ყოფილი სახელმწიფო მდივნის, ჰილარი კლინტონისთვის, მათ კერძო მისამართებზე. აშშ-ის საიდუმლო სამსახური 24ოქტომბერს გაკეთებულ განცხადებაში აღნიშნავს, რომ მან გზაში შეაჩერა ამანათები. ხოლო ტელეკომპანია CNN-ის ცნობით, აღმოჩენილია აგრეთვე „საეჭვო ამანათი“, რომელიც თეთრი სახლის მისამართზე იყო გაგზავნილი. ამ საკითხზე ჯერ არ გაკეთებულა ოფიციალური განცხადება. მოგვიანებით CNN-მა გაავრცელა ცნობა, რომ ევაკუაცია მოხდა ნიუ-იორკში მისი ოფისიდან, იქ ნაპოვნი საეჭვო ამანათების შესახებ გავრცელებული ინფორმაციის გამო. CNN-ის ფოტოებზე ჩანს, რომ შენობასთან ბევრი პოლიციელი მივიდა. თეთრმა სახლმა უმალვე დაგმო ობამაზე, კლინტონსა და სხვა „საჯარო პირებზე“ თავდასხმის მცდელობები. სააგენტო „ასოშიეიტიდ პრესის“ ინფორმაციით, გამომძიებლები ვარაუდობენ, რომ კლინტონისა და ობამასთვის გაგზავნილი ამანათები უკავშირდება საფოსტო გზავნილს, რომელიც 22 ოქტომბერს იპოვეს მილიარდერი ქველმოქმედის, ჯორჯ სოროსის სახლში.