საქართველოს ნავთობისა და გაზის სახელმწიფო სააგენტომ და ამერიკულმა ნავთობკომპანიამ „ექსონ მობილმა“ დღეს თბილისში მოაწერეს ხელი გეოლოგიური და გეოფიზიკური მასალების შესწავლის ხელშეკრულებას. დოკუმენტის თანახმად, ამერიკული კომპანია შეაფასებს დასავლეთ საქართველოს ნახშირწყალბადების პოტენციალს და სააგენტოს მიერ გადაცემული გეოლოგიური და გეოფიზიკური მონაცემების შესწავლის შედეგად მოამზადებს და სახელმწიფოს გადასცემს ანგარიშს და ინტეგრირებულ მონაცემთა ბაზას. ეკონომიკის და მდგრადი განვითარების სამინისტროს ინფორმაციით, ანგარიში გამოყენებული იქნება შემდგომი სამუშაოების დაგეგმვისთვის, რომლის მიზანი ნავთობისა და გაზის დაგროვებების აღმოჩენაა. „მარტო ის ფაქტი, რომ ისეთი დიდი კომპანია, მსოფლიო ლიდერი, როგორიც „ექსონმობილია“ დაინტერესდა საქართველოში ნავთობის პოტენციალით, უკვე ძალიან ბევრზე მეტყველებს. ჩვენ იმედი გვაქვს, რომ გვექნება შესაძლებლობა, გაზისა და ნავთობის რესურსები ჩვენი ქვეყნის სასარგებლოდ გამოვიყენოთ“ - განაცხადა ეკონომიკისა და მდგრადი განვითარების მინისტრმა, გიორგი ქობულიამ.
