თითქმის ექვსთვიანი მისია ერაყის ციხიდან საქართველოს მოქალაქე სამი ბავშვის სამშობლოში დასაბრუნებლად 13 ოქტომბერს წარმატებით დასრულდა. 6, 5 და 2 წლის ბავშვები ერაყიდან საქართველოში, დედის ოჯახში დაბრუნდნენ, რომელიც სასჯელს ერაყის ციხეში იხდის. მოლაპარაკებებს თვეების განმავლობაში იუსტიციის სამინისტრო აწარმოებდა. ბავშვებს საქართველოში იუსტიციის მინისტრი თეა წულუკიანი დახვდა. მათი დაბრუნების პროცესში ერაყში საქართველსო ელჩი გიორგი ტაბატაძე საერთაშორისო ორგანიზაციებთან UNICEF და ICRC-ის ერაყის ოფისებთან ერთად იყო ჩართულები.
სამი მცირეწლოვანი ბავშვი ერაყის ციხეში მას მერე მოხვდა, რაც ერაყის სასამართლომ მათი დედა, 1993 წელს დაბადებულ საქართველოს მოქალაქე შ. ს.-ს მიუსაჯა უვადო პატიმრობა, ერაყის რესპუბლიკაში ბრძოლებში დაღუპული რუსეთის ფედერაციის მოქალაქის, ტერორიზმში ბრალდებული პირის მეუღლის სტატუსის გამო. ტერორიზმში ბრალდებული პირი გარდაცვლილია, ხოლო ადგილობრივი კანონების მიხედვით საქართველოს მოქალაქეს, რომელსაც ბრალი მეუღლის სტატუსის ქონის გარდა სხვა არაფერში ედება, სამუდამო პატიმრობა აქვს მისჯილი.