სავარაუდოდ რუსეთის დაზვერვისთვის მომუშავე ჰაკერებმა 2015 წელს შეაღწიეს დიდი ბრიტანეთის მუსლიმური ტელეარხის, Islam Channel-ის კომპიუტერულ სისტემაში. ამის შესახებ გაზეთი „ფაინენშლ ტაიმსი“ იტყობინება ტელეარხის წარმომადგენლებზე დაყრდნობით.
დიდი ბრიტანეთის შინაგან საქმეთა სამინისტრომ დააზუსტა, რომ ამ კიბერთავდასხმის უკან იდგა არა მოყვარული ჰაკერი, არამედ იერიში სახელმწიფო დონეზე განხორციელდა.
Islam Channel-ის თანახმად, ბოროტმოქმედებმა წვდომა მოიპოვეს ტელეარხის მთელს შინაგან საინფორმაციო სისტემაზე. მომხმარებლები კი რამდენიმე კვირის განმავლობაში ვერ სარგებლობდნენ ელექტრონული ფოსტით.
„ფაინენშლ ტაიმსი“ წერს, რომ კიბერთავდასხმის მოტივი უცნობია. გაზეთი აღნიშნავს, რომ ის შესაძლოა არის ნაწილი რუსეთის სამხედრო დაზვერვის კიბერკამპანიისა ევროპის მასმედიის წინააღმდეგ.
Islam Channel-მა 2004 წელს დაიწყო მაუწყებლობა. ტელეარხის ცნობით, მას დიდ ბრიტანეთსა და რუსეთში მცხოვრები მილიონობით მუსლიმი უყურებს.