ათობით ათასი ადმიანი გამოვიდა 29 სექტემბერს კოსოვოს დედაქალაქ პრიშტინას ქუჩებში, რათა გამოეხატათ თავიანთი პროტესტი სერბეთთან შესაძლო სასაზღვრო ცვლილების წინააღმდეგ. სკანდერბეგის მოედანზე შეკრებილი კოსოვოს ოპიზიციური "თვითგამორკვევის პარტიის" მომხრეებს ხელში ეკავათ ალბანეთის სახელმწიფო დროშები და ტრანსფარანტები წარწერით: „არა ჩვენი ქვეყნის მიწებით ვაჭრობას“! დემონსტრანტები ასევე სკანდირებდნენ: „ძირს, ჰაშიმ ტაჩი!“ აგვისტოს დასაწყისში კოსოვოს პრეზიდენტი, ჰაშიმ ტაჩი გამოვიდა წინადადებით, სერბიის პრესევოს ხეობის კოსოვოსთან მიერთების თაობაზე. პრესევოს ხეობის მოსახლეობის უდიდესი უმრავლესობა ეთნიკური ალბანელია, ისევე, როგორც სამხრეთ სერბიის მეზობელი რეგიონებისა. შეთანხმების მიღწევის შედეგად ქალაქ მიტროვიცის მახლობლად სერბებით დასახლებული კოსოვოს ნაწილი გადაეცემოდა სერბიას. კოსოვოს ოპოზიციური თვითგამორკვევის პარტია პრეზიდენტ ჰაშიმ ტაჩის ადანაშაულებს კოსოვოს ტერიტორიის სერბეთისათვის მიყიდვაში. ვითარება დაიძაბა მას შემდეგ, რაც შაბათს დღის პირველ ნახევარში ჰაშიმ ტაჩი გაზივოდეს ტბის კოსვოს იმ რეგიონს ესტუმრა, სადაც ეთნიკური სერბები დომინირებენ. არეალში უსაფრთხოების უზრუნველსაყოფად კოსოვოს სპეცდანიშულების ნაწილი გადაისროლეს. ამ ფაქტის გამო სერბეთის უსაფრთხოების ძალებში განგაში გამოცხადდა. მაია კოჩიანჩიჩმა, ევროკავშირის საგარეო პოლიტიკური ლიდერის, ფედერიკა მოგერინის პრესმდივანმა მხარეებს „სიმშვიდისა და თავშეკავებისაკენ“ მოუწოდა.
