საქართველოს სამუშაო ვიზიტით ეწვევა გაეროს დამოუკიდებელი ექსპერტი გენდერული იდენტობისა და სექსუალური ორიენტაციის საკითხებში ვიქტორ მადრიგალი.
„თანასწორობის მოძრაობის“ ცნობით, დამოუკიდებელი ექსპერტი შეხვდება ხელისუფლების წარმომადგენლებს, რომელთა კომპეტენციაში შედის ლგბტქ ადამიანების წინააღმდეგ სიძულვილისა და ძალადობის აღმოფხვრისთვის მუშაობა. საქართველოში ჩამოსვლამდე გაეროს ექსპერტი უკვე გაეცნო ანგარიშს, რომელიც მას არასამთავრობო ორგანიზაციებმა „თანასწორობის მოძრაობამ“ და „ქალთა ინიციატივების მხარდამჭერმა ჯგუფმა“ („ილგა ევროპასთან“ ერთად) გაუგზავნეს. მასში საუბარია იმ გამოწვევებზე, რომელთა წინაშე საქართველოში მცხოვრები ლგბტქ თემის წევრები დგანან. ის ასევე ყურადღებას გაამახვილებს როგორ და რა მეთოდებით პასუხობს სახელმწიფო დისკრიმინაციას (საკონსტიტუციო, სამართლებრივი და ინსტიტუციური ჩარჩო, ასევე ინტერსექტორული თანამშრომლობა ძალადობისა და დისკრიმინაციის წინააღმდეგ), შეისწავლის თუ რა გამოწვევები და ჩავარდნები აქვს სახელმწიფოს ძალადობისა და დისკრიმინაციასთან ბრძოლისას.
მადრიგალის ვიზიტის შემაჯამებელ პრესკონფერენცია თბილისში გაიმართება, სადაც დამოუკიდებელი ექსპერტი მიმოიხილავს ვიზიტის წინასწარ შედეგს, ხოლო 2019 წლის ივლისში გამოქვეყნდება ანგარიში, რომელშიც ასახული იქნება რეკომენდაციები ხელისუფლებისადმი ლგბტქ ადამიანების მიმართ ძალადობისა და დისკრიმინაციის შემთხვევების აღმოსაფხვრელად.