პაკისტენლმა კანონმდებლებმა ქვეყნის ახალ პრეზიდენტად აირჩიეს არიფ ალვი - მმართველ პარტია „თეჰრიკ-ე ინსაფის“ მიერ წამოყენებული კანდიდატი. პაკისტანის პრეზიდენტობა, ძირითადად, ცერემონიულ მოვალეობებს უკავშირდება. პრეზიდენტს ირჩევენ ეროვნული ასამბლეის, სენატისა და ოთხი რეგიონული ასამბლეის წევრი კანონმდებლები. წინასწარვე მოელოდნენ, რომ ალვი იოლად გაიმარჯვებდა. პაკისტანში წელს 25 ივლისს გაიმართა საპარლამენტო არჩევნები, რასაც მოჰყვა მთავრობის სათავეში იმრან ხანის - კრიკეტის ყოფილი ვარსკვლავისა და ყოფილი ოპოზიციონერი პოლიტიკოსის - ჩადგომა. არიფ ალვი, რომელიც იმრან ხანის სტაჟიანი მოკავშირეა, პრეზიდენტის პოსტზე შეცვლის მამნუნ ჰუსაინს, რომელიც 8 სექტემბერს დაასრულებს პრეზიდენტობის ხუთწლიან ვადას.
