საქართველოს პრეზიდენტობის დამოუკიდებლი კანდიდატი სალომე ზურაბიშვილი აცხადებს, რომ საფრანგეთის პრემიერმა და შინაგან საქმეთა მინისტრმა ხელი მოაწერეს განკარგულებას, რომლის მიხედვით, იგი აღარ ითვლება საფრანგეთის მოქალაქედ. „არ შეიძლება ქვეყნის პრეზიდენტი ამავდროულად იყოს სხვა ქვეყნის მოქალაქე. მე ამ გადაწყვეტილებას ვიღებ სრული პასუხისმგებლობით და ეს არის აუცილებელი. მე ძალიან ბედნიერი და ამაყი ვარ, რომ ამ დღიდან მხოლოდ საქართველოს მოქალაქე ვარ“, -განაცხადა ზურაბიშვილმა და ხაზი გაუსვა იმ დიდ დახმარებას, რაც „საფრანგეთმა ქართველებს ერთი საუკუნის მანძილზე გაუწია“. ცენტრალური საარჩევნო კომისიის მონაცემებით, ამ დროისათვის საქართველოს პრეზიდენტობის სურვილით კომისიას მიმართა 30-მა სუბიექტმა. საარჩევნო კომისიამ 14 სუბიექტის საინიციატივო ჯგუფს კანდიდატის დაყენებაზე მოთხოვნა უკვე დაურეგისტრირა, ხოლო 16 სუბიექტის მოთხოვნას კვლავ განიხილავს. ცენტრალურ საარჩევნო კომისიაში კანდიდატების წარდგენის ვადა 8 სექტემბერს იწურება.
