რუსეთის საგარეო საქმეთა სამინისტროს ცნობით, ავღანეთის პრეზიდენტის თხოვნის საფუძველზე გადაიდო მრავალმხრივი მოლაპარაკება, რომლის მიზანი ავღანეთში ომის დასრულება უნდა იყოს. 27 აგვისტოს გავრცელებულ განცხადებაში სამინისტრო ამბობს, რომ მოლაპარაკება, რომელშიც 12 მონაწილეს უნდა მიეღო მონაწილეობა, თალიბანის წარმომადგენლების ჩათვლით, მოგვიანებით გაიმართება. მოლაპარაკება თავდაპირველად 4 სექტემბრისთვის იყო დანიშნული და მას ავღანეთში სამშვიდობო პროცესისთვის უმნიშვნელოვანეს ღონისძიებად განიხილავდნენ. გასულ კვირაში ავღანეთის პრეზიდენტის, აშრაფ ღანის წარმომადგენლებმა თქვეს, რომ მისი მთავრობა არ მიიღებდა მონაწილეობას შეხვედრაში და დასძინეს, რომ პროცესს ავღანეთის მთავრობა უნდა ხელმძღვანელობდეს. ღანიმ თალიბანს ერთი თვით ცეცხლის შეწყვეტა შესთავაზა, ამ ინიციატივას ვაშინგტონი უჭერდა მხარს. მოსკოვში დანიშნულ მოლაპარაკებაში მონაწილეობაზე უარი განაცადა აშშ-მაც, რომელსაც ავღანეთში ათასობით სამხედრო ჰყავს - მისი განცხადებით, შეხვედრა დიდი ალბათობით წარმატებას არ მოიტანდა. ასეთ ფონზე, თალიბანი სულ უფრო ინტენსიურად ახორციელებს თავდასხმებს ავღანეთის მასშტაბით და უარს ამბობს ქაბულთან პირდაპირ მოლაპარაკებაზე. აშშ-ის ოფიციალურმა წარმომადგენლებმა გასულ კვირაში განაცხადეს, რომ თეთრი სახლი აპირებს ავღანეთში საგანგებო წარმომადგენლად დანიშნოს ავღანური წარმოშობის დიპლომატი, ზალმაი ხალილზადი.
