რუსი ქალი, რომელსაც აშშ ბრალს სდებს რუსეთის მთავრობის აგენტობაში, ქალაქ ვაშინგტონის საპატიმროდან გადაიყვანეს ვირჯინიის შტატში, ალექსანდრიაში განთავსებულ ციხეში - აცხადებენ მისი ადვოკატი და ციხის მესვეურები. 29 წლის ბუტინა ახალ ციხეში 17 აგვისტოს გადაიყვანეს, საპატიმროს შეცვლის მიზეზი არ დასახელებულა. ბუტინას ადვოკატმა, რობერტ დრისკოლმა სააგენტო "ტასს" უთხრა, რომ მისი კლიენტის გადაყვანის, ან ამის მიზეზების შესახებ მისთვის არ უცნობებიათ. რუსეთის საელჩომ 19 აგვისტოს გაავრცელა განცხადება, რომ მისმა დიპლომატებმა ბუტინა გადაყვანის შემდეგ მოინახულეს. ბუტინას ბრალად ედება პოლიტიკურ ჯგუფებში შეღწევის მცდელობა, მათ შორის იარაღის ეროვნულ ასოციაციაში, რუსეთის ინტერესების სასარგებლოდ, მოსკოვში ოფიციალური პირისთვის ინფორმაციის მიწოდების ჩათვლით. ბუტინა თავს არ მიიჩნევს დამნაშავედ.