საგარეო საქმეთა სამინისტროს ინფორმაციით, ირანის მოქალაქეთა მიმართ არ გამოვლენილა რელიგიური გრძნობების შემლახავი რაიმე ქმედება ქართველი სამართალდამცველების მხრიდან. უწყების ცნობით, ირანელი მოქალაქეების ნაწილის მიერ გამოთქმული უკმაყოფილების საფუძველზე, საავიაციო უსაფრთხოების ოფიცერთა მიერ მგზავრთა გადამოწმების პროცედურების შესწავლა შინაგან საქმეთა სამინისტროს შესაბამისმა სამსახურებმა დაიწყო. მანამდე, საქართველოში მოქმედმა ირანის საელჩომ პროტესტის ნოტა გაუგზავნა საქართველოს საგარეო საქმეთა სამინისტროს იმ ინფორმაციის გამო, რომ თბილისის საერთაშორისო აეროპორტში გამოვლინდა არასათანადო მოპყრობა ირანის ზოგიერთი მოქალაქის მიმართ. გავრცელდა ინფორმაცია, რომ (თბილისი-ისპაჰანის რეისზე) თბილისის აეროპორტის უსაფრთხოების სამსახურის თანამშრომლები ირანელ ქალს თავსაბურავის მოხსნას აიძულებდნენ.
“ქართული მხარისთვის ირანის დიპლომატიური არხებით ცნობილი გახდა, რომ თბილისის საერთაშორისო აეროპორტში, უსაფრთხოების ზომებიდან გამომდინარე გადამოწმების პროცედურებზე ირანის მოქალაქეთა ნაწილი უკმაყოფილებას გამოთქვამს. ინფორმაციის მიღებისთანავე საქართველოს შინაგან საქმეთა სამინისტროს შესაბამისმა სამსახურებმა დაუყოვნებლივ დაიწყეს აეროპორტში საავიაციო უსაფრთხოების ოფიცერთა მიერ მგზავრთა გადამოწმების პროცედურების შესწავლა. პირველადი მონაცემებით და გატარებული ოპერატიული ღონისძიებებით, ქართველი სამართალდამცველების მხრიდან მართლსაწინააღმდეგო, მათ შორის რელიგიური გრძნობების შემლახავი რაიმე ქმედება არ გამოვლენილა. აღნიშნულის შესახებ ირანის მხარეს უკვე ეცნობა. საგარეო საქმეთა სამინისტროში ჩანიშნულია შეხვედრა ირანის ელჩთან სადაც კიდევ ერთხელ გავივლით აღნიშნულ საკითხს“, - განუცხადეს რადიო თავისუფლებას საგარეო საქმეთა სამინისტროში.