ჩინელი სამხედროები ბოლო სამი წლის განმავლობაში სულ უფრო ხშირად ატარებენ ბომბდამშენების სამხედრო სწავლებას, რაც შეიძლება ადასტურებდეს ამერიკის შეერთებულ შტატებსა და მის მოკავშირეებზე თავდასხმის განზრახვას - ასეთ დასკვნამდე მივიდნენ ამერიკის შეერთებული შტატების თავდაცვის სამინისტროში. მოხსენება პენტაგონის ვებსაიტზეა გამოქვეყნებული. მასში აღნიშნულია, რომ ჩინეთის არმია ზრდის შესაძლებლობებს „სამიზნეების დასამარცხებლად“ ჩინეთის სახალხო რესპუბლიკის საზღვრებიდან რაც შეიძლება შორს.
ამერიკელი სამხედროები მიუთითებენ, რომ ჩინეთი სწავლებებს ატარებს ასევე რთულ საზღვაო მონაკვეთებზე იმ მიზნით, რომ ისწავლონ, როგორ მიიტანონ დარტყმები აშშ-ს ბაზებზე წყნარ ოკეანეში.
მიმდინარე წლის მაისში ჩინეთმა სამხრეთ ჩინეთის ზღვაში სადავო კუნძულებზე თავისი სტრატეგიული ბომბდამშენები გაუშვა. ამერიკის შეერთებულ შტატებში რეგიონის მილიტარიზაციის გამო შეშფოთება გამოხატეს. აშშ-სა და ჩინეთს შორის ურთიერთობა ეგრეთ წოდებული სავაჭრო ომის გამო გამწვავდა. მოსალოდნელია, რომ მიმდინარე თვის ბოლოსთვის ქვეყნების წარმომადგენლები ეკონომიკურ საკითხებზე ვაშინგტონში იმსჯელებენ.