„დიალოგს ალტერნატივა არ გააჩნია, თუმცა ეს დიალოგი არ უნდა იყოს პოლიტიზირებული“ - აღნიშნა საქართველოს საგარეო საქმეთა მინისტრმა დავით ზალკალიანმა აფხაზეთის დეფაქტო რესპუბლიკის ყოფილი ე.წ. პრემიერ-მინისტრის, სერგეი შამბას იმ განცხადების კომენტირებისას, რომელიც აფხაზეთისა და საქართველოს, როგორც მეზობელი ხალხების დიალოგის დაწყების საჭიროებას შეეხება.
საქართველოს საგარეო საქმეთა მინისტრი ფიქრობს, რომ საქართველოს ხელისუფლების ინიციატივა „ნაბიჯი უკეთესი მომავლისაკენ“ კარგი შესაძლებლობაა საუბრისა და დიალოგისთვის. „ ჩვენ გვაქვს ძალიან მნიშვნელოვანი სამშვიდობო ინიციატივები. ჩვენი პასუხი ბარიერებზე და ხელოვნურ გამყოფ ხაზებზე არის თანამშრომლობა საქართველოს ევროპული ინტეგრაციის სიკეთეების გაზიარების კუთხით. სამშვიდობო ინიციატივა „ნაბიჯი უკეთესი მომავლისაკენ“, რომელიც საქართველოს ხელისუფლებამ წარადგინა, ითვალისწინებს სწორედ ამ სამშვიდობო ინიციატივების გაზიარებას ოკუპირებული ხაზის მეორე მხარე მყოფი ჩვენი თანამოქალაქეებისათვის. ჩვენ ვფიქრობთ, რომ ეს არის კარგი შესაძლებლობა ის საუბრისთვის და დიალოგისთვის და სწორედ ამ შესაძლებლობას ვთავაზობთ ოკუპირებულ ტერიტორიებზე მცხოვრებ ჩვენს თანამოქალაქეებს. ჩვენ წინააღმდეგი ვართ ყოველგვარი პოლიტიზირების ამ დიალოგის და ვთავაზობთ ისეთ თემებს, რომელიც გაგვაერთიანებს და არ გაგვყოფს“ - აღნიშნა საქართველოს საგარეო საქმეთა მინისტრმა.
რადიოსადგურ „ეხო მოსკვასთვის“ მიცემულ ინტერვიუში აფხაზეთის დე ფაქტო რესპუბლიკის ყოფილმა ე.წ. პრემიერ-მინისტრმა და დე ფაქტო პარლამენტის ე.წ. დეპუტატმა სერგეი შამბამ განაცხადა, რომ დგება დრო, როდესაც საჭიროა ურთიერთობების დალაგება, დიალოგის დაწყება და საქართველოსთან საერთო მომავალზე ფიქრი „იმ გაგებით, რომ ჩვენ მეზობელი ხალხები ვართ.“
