უკრაინის კულტურის სამინისტრომ რუსი მწერალი ზახარ პრილეპინი შეიყვანა იმ პირთა სიაში, რომლებიც საფრთხეს უქმნიან ქვეყნის ეროვნულ უშიშროებას. ამის შესახებ იუწყება საინფორმაციო სააგენტო „ინტერფაქსი“. ამჟამად "შავ სიაშია" 138 ადამიანი. სია შედგენილია უკრაინის კულტურის სამინისტროს მიერ, ქვეყნის უშიშროების სამსახურის მონაცემებისა და უკრაინის ეროვნული უშიშროებისა და თავდაცვის საბჭოს მიმართვების საფუძველზე. პრილეპინის გარდა სიას დაამატეს რუსი მწერლები ალექსანდრ ტამონიკოვი და ალექსანდრ შიროკორადი. აღმოსავლეთ უკრაინაში შეიარაღებული დაპირისპირების დაწყებიდანვე, პრილეპინი აქტიურად ემხრობა სეპარატისტებს. მწერალი მუშაობდა „დონეცკის სახალხო რესპუბლიკაში“ სეპარატისტების ერთ-ერთი ქვედანაყოფის მეთაურის მოადგილედაც. ამის გამო პრილეპინს ტერორიზმის ბრალდება წაუყენა უკრაინის უშიშროების სამსახურმა.
