საქართველოს საკონსტიტუციო სასამართლომ დააკმაყოფილა საქართველოს მოქალაქეების, ზურაბ ჯაფარიძის და ვახტანგ მეგრელიშვილი სარჩელი პარლამენტის წინააღმდეგ. სადავო ნორმა, რომელიც სასამართლომ არაკონსტიტუციურად ცნო, ადმინისტრაციულ სამართალდარღვევად განსაზღვრავს ნარკოტიკული საშუალების, მარიხუანის ექიმის დანიშნულების გარეშე მოხმარებას და ადგენს შესაბამის სანქციას. მოსარჩელეები, "გირჩის" წარმომადგენლები, ზურაბ ჯაფარიძე და ვახტანგ მეგრელიშვილი აცხადებდნენ, რომ მარიხუანის მოხმარება წარმოადგენს პიროვნების თავისუფალი განვითარების უფლებით დაცულ სფეროს, მისი მოხმარებით შესაძლოა, ზიანი მიადგეს მხოლოდ მომხმარებლის ჯანმრთელობას, რომელიც თავადვე იქნება პასუხისმგებელი დამდგარ შედეგზე და არ უქმნის საფრთხე სხვა რომელიმე ღირებულ, საჯარო ინტერესს. მოსარჩელეთა განცხადებითვე, მარიხუანის მომხმარებლის დასჯა მხოლოდ მორალისტური და პატერნალისტური არგუმენტებით ეწინააღმდეგება პიროვნების თავისუფალი განვითარების უფლებას და შესაბამისად, ეწინააღმდეგება საქართველოს კონსტიტუციის მე-16 მუხლს.
