საქართველოს იუსტიციის მინისტრმა, საპროკურორო საბჭოს თავმჯდომარემ, თეა წულუკიანმა დაადასტურა, რომ მთავარი პროკურორობის ერთ-ერთი კანდიდატის, შალვა თადუმაძის შვილის ნათლიაა.
„ჩემი ნათესავი თადუმაძე არ არის, მე ვარ მისი შვილის ნათლია. გავიცანი პოლიტიკურ ბრძოლაში 2012 წელს, როდესაც ბიძინა ივანიშვილის გარშემო ვიყავით იურისტების ჯგუფი შეკრებილი. ამ ჯგუფში იყო არჩილ კბილაშვილი, შალვა თადუმაძე, ალექსანდრე ბარამიძე, ზაქრო ქუცნაშვილი და მე. ეს იყო საკმაოდ შთამბეჭდავი ჯგუფი იურისტების და ასე შედგა ჩემი ნაცნობობა ბატონ შალვასთან“, - განუცხადა ჟურნალისტებს თეა წულუკიანმა. მისივე თქმით, საპროკურორო საბჭოსთვის წარდგენილი სამივე კანდიდატი ღირსეულია, თუმცა, პასუხობენ თუ არა ისინი საპროკურორო საბჭოს მოლოდინებს, სადაც პროკურორები, მოსამართლეები, დეპუტატები, ადვოკატთა ასოციაციისა და აკადემიური წრეების წარმომადგენლები არიან, ეს გამოჩნდება საბჭოს სხდომის კვალდაკვალ. წულუკიანის ინფორმაციით, ამ კვირაში ჩატარდება საპროკურორო საბჭოს სხდომა და კანდიდატებთან გასაუბრება.
„ერთ-ერთი კანდიდატისადმი მაქვს ძალიან დიდი კითხვა, ამ კითხვასაც არ დავსვამ და შეიძლება კენჭისყრაშიც არ მივიღო მონაწილეობა იმისთვის, რომ საზოგადოებამ დაინახოს საბჭოს რა სურს“ - განაცხადა წულუკიანმა. მისი თქმით, საპროკურორო საბჭოს სხდომის აუდიოჩანაწერები საბჭოს ვებსაიტზე განთავსდება.
მთავარი პროკურორობის კანდიდატები არიან თბილისის სახელმწიფო უნივერსიტეტის მიერ წარდგენილი ნინო გოგნიაშვილი და შალვა თადუმაძე და პარტია „ევროპული საქართველოს“ მიერ წარდგენილი შალვა შავგულიძე.
