რუსეთში დაპატიმრებული უკრაინელი რეჟისორის, ოლეგ სენცოვის ჯანმრთელობის მდგომარეობა გაუარესებულია - იუწყება მისი ადვოკატი. სენცოვი უკვე 40 დღეა შიმშილობს. დმიტრი დინზემ რადიო თავისუფლებას 22 ივნისს განუცხადა, რომ სენცოვმი შიმშილობის დაწყების შემდეგ 15 კილოგრამით გახდა და გულთან და თირკმელებთან დაკავშირებული პრობლემები განუვითარდა. სენცოვის გათავისუფლებას რამდენიმე ადამიანის უფლებების ორგანიზაცია ითხოვს. კრემლის წარმომადგენელმა, დმიტრი პესკოვმა განაცხადა, რომ უკრაინელმა რეჟისორმა შეწყალება თავად უნდა ითხოვოს, რათა ეს საკითხი განიხილონ. დინზემ 22 ივნისს განაცხადა, რომ სენცოვი შეწყალებას არ მოითხოვს. რუსეთის სპეცსამსახურების თანამშრომლებმა უკრაინელი რეჟისორი ოლეგ სენცოვი და სამოქალაქო აქტივისტი ალექსანდრ კოლჩენკო 2014 წლის მაისში დააკავეს ანექსირებულ ყირიმში და ბრალად დასდეს ტერაქტების ორგანიზება. 2015 წლის აგვისტოში, დონის როსტოვის სასამართლომ სენცოვს 20 წლით, კოლჩენკოს კი 10 წლით პატიმრობა მიუსაჯა. ორივე მათგანი პოლიტპატიმრად აღიარა უფლებადამცველმა ორგანიზაციამ „მემორიალმა.“