საქართველოს ძიუდოისტთა ნაკრების კაპიტანმა ვარლამ ლიპარტელიანმა გაავრცელა იმ სპორტსმენთა სია, რომლებიც ფედერაციის პრეზიდენტ დავით ქევხიშვილის გადადგომას მოითხოვენ. ამით უპასუხა ლიპარტელიანმა ქევხიშვილის მიერ ერთ-ერთ ტელეარხზე გაკეთებულ განცხადებას, თითქოს აქციაში მხოლოდ რამდენიმე ძიუდოისტია ჩართული და ნაკრების წევრთა ნაწილი მომავალი შეჯიბრებებისთვის ემზადება, ნაწილი კი მხოლოდ ხათრის გამო დგას აქციის ინიციატორი ძიუდოისტების გვერდით.
ვარლამ ლიპარტელიანის მიერ გავრცელებულ სიაშია ეროვნული ნაკრების აბსოლუტურად ყველა წევრი, ასევე ნაკრების კანდიდატთა უმრავლესობა.
ფედერაციის პრეზიდენტის გადადგომის მოთხოვნით ძიუდოისტებმა დღეს ორი საპროტესტო აქცია გამართეს - დილით ძიუდოს ფედერაციასთან, საღამოს კი მთავრობის კანცელარიასთან. სპორტსმენებმა უნდობლობა გამოუცხადეს კულტურისა და სპორტის სამინისტროს ინიციატივით შექმნილ კომისიას და ქვეყნის პრემიერ-მინისტრთან, გიორგი კვირიკაშვილთან, შეხვედრას ითხოვენ.
საქართველოს ძიუდოისტთა ნაკრების წევრთა ნაწილი, უკვე სამი კვირაა, პროტესტის ნიშნად აღარ ვარჯიშობს. ისინი ამბობენ, რომ დავით ქევხიშვილის პრეზიდენტად დარჩენის შემთხვევაში არც ერთ შეჯიბრებაში აღარ მიიღებენ მონაწილეობას, ეს პროტესტი კარიერის დასრულების ფასადაც რომ დაუჯდეთ.
