ევროპის პარლამენტის ათეულობით დეპუტატი ევროკავშირს მოუწოდებს შეიმუშავოს კანონმდებლობა, რომელიც რუსეთის ბიზნესმენებს დასჯიდა ფულის გათეთრებისკენ მიმართული ნაბიჯებისთვის ბლოკის შიგნით. ეს ნაბიჯები, დეპუტატთა შეფასებით, მიზნად ისახავს კრემლის ანტიდემოკრატიული ქმედებების მხარდაჭერას. დეპუტატები ამ მოწოდებით გამოვიდნენ 26 აპრილით დათარიღებულ წერილში, რომლის ადრესატებია ევროკავშირის საბჭოს პრეზიდენტი, დონალდ ტუსკი, ევროპის კომისიის პრეზიდენტი, ჟან-კლოდ იუნკერი, ევროკავშირის საგარეო-პოლიტიკური ლიდერი, ფედერიკა მოგერინი და ევროკავშირის 28 წევრი ქვეყნის მეთაურები. წერილს, რომელსაც რადიო თავისუფლება გაეცნო, ჯერჯერობით 44 დეპუტატი აწერს ხელს. ისინი გამოდიან მოწოდებით შეიქმნას აშშ-ის "მაგნიტსკის აქტის" ევროკავშირისეული ვერსია. ეს აქტი 2012 წელს შემოიღეს და მისი სამიზნე რუსეთის ის მოქალაქეები იყვნენ, რომლებსაც ვაშინგტონი შეაფასებდა ადამიანის უფლებების დარღვევის პრაქტიკის მონაწილეებად. ევროპარლამენტარები ამბობენ, რომ ამ კანონის ევროკავშირისეულმა ვერსიამ მიზანში უნდა ამოიღოს "რუსი მაგნატები და ოლიგარქები, რომლებიც უპატიოსნო თანხებს წევრ ქვეყნებში ინახავენ და ათეთრებენ, რითიც [პრეზიდენტ ვლადიმირ] პუტინს ეხმარებიან განახორციელოს თავისი ანტიდემოკრატიული ქმედებები". დეპუტატებს ამ ქმედებების მაგალითად მოაქვთ "არჩევნებში ჩარევა, კიბერთავდასხმები, ყალბი ახალი ამბები და პროპაგანდისტული კამპანიები".
