„ერთიანი ნაციონალური მოძრაობის“ საპარლამენტო ფრაქციის თავმჯდომარის, რომან გოცირიძის განცხადებით, ბიძინა ივანიშვილის პოლიტიკაში დაბრუნებაზე საუბარი არასწორია, რადგან ის არსად წასულა და უბრალოდ, კომფორტის ზონიდან გამოვიდა. გოცირიძის შეფასებით, ეს ნაბიჯი ნიშნავს ივანიშვილის მიერ მარცხის აღიარებას, რადგან წასვლისას განაცხადა, რომ მხოლოდ კრიზისის შემთხვევაში დაბრუნდებოდა. რომან გოცირიძის განცხადებითვე, დაბრუნება კრიზისს ვერ მოაგვარებს. კრიზისზე მიუთითებს საპარლამენტო უმცირესობის და „ევროპული საქართველოს“ ერთ-ერთი ლიდერი, გიგა ბოკერიაც. “ქართული ოცნების რეალური მმართველის იძულება, რომ ჩრდილიდან გამოსულიყო, ადასტურებს, რომ ღრმა კრიზისია როგორც პარტიაში, ისე მთელ ქვეყანაში, მაგრამ ეს ამბავი ქვეყანას ვერ უშველის“ - განაცხადა ბოკერიამ. მისივე თქმით, ქვეყანას უშველის არჩევნების გზით ხელისუფლებიდან „ქართული ოცნების“ ჩამოშორება. ბიძინა ივანიშვილის გადაწყვეტილება, დაბრუნდეს მმართველი პარტიის თავმჯდომარედ, „ქართული ოცნების” პოლიტიკურ კრახად შეაფასა „შენების მოძრაობის“ ლიდერმა, დავით უსუფაშვილმა. მისი განცხადებით, ივანიშვილს აქვს მეორე მცდელობა, თავი მოუყაროს პოლიტიკურ გუნდს ქვეყნის სამართავად და საინტერესოა, შეძლებს თუ არა მის მიერვე დაშვებული შეცდომების გააზრებას და ჯანსაღი პოლიტიკური გუნდის ჩამოყალიბებას. „რესპუბლიკური პარტიის“ ერთ-ერთი ლიდერის, დავით ბერძენიშვილის შეფასებით, ბიძინა ივანიშვილი ხელისუფლებას კრიზისიდან ვერ გამოიყვანს. „როდესაც პარტიის დამფუძნებელი, პირველი თავმჯდომარე ორი მომდევნო თავმჯდომარის შემდეგ ბრუნდება პარტიის ხელმძღვანელად, ეს ნიშნავს რომ პარტია დაჟანგებულია და ჟანგისგან მისი გათავისუფლება ჟანგის უზრუნველმყოფ ივანიშვილს არ შეუძლია” - განუცხადა სააგენტო „ინტერპრესნიუსს“ ბერძენიშვილმა. მან არ გამორიცხა, რომ ბიძინა ივანიშვილს, როგორც ეჭვიან ადამიანს, გადაწყვეტილების მიღება დააჩქარებინა სომხეთში მიმდინარე მოვლენებმა. პარტია „თავისუფალი დემოკრატების“ გენერალური მდივნის, თამარ კეკენაძის შეფასებით, ბიძინა ივანიშვილმა პოლიტიკაში დაბრუნებით აღიარა, რომ მისმა არაფორმალურმა მმართველობამ და არაკომპეტენტურმა გუნდმა საქართველოს განვითარება ჩიხში შეიყვანა. „ამ ნაბიჯით ივანიშვილი ეცდება შექმნას ილუზია, რომ ქვეყნის მართვის მოდელი ფორმალურ, სამართლებრივ ჩარჩოს უბრუნდება, რაც ილუზიაა, რადგან იმ რეალობაში, როდესაც პარტიის თავმჯდომარეს ექნება უფრო მეტი ძალაუფლება, ვიდრე პრემიერ-მინისტრს, პარლამენტის თავმჯდომარესა და სხვა ნებისმიერ ინსტიტუციას, ქვეყნაში რაიმე ტიპის პროგრესზე და დემოკრატიულ განვითარებაზე ლაპარაკიც კი ზედმეტია“ - განაცხადა თამარ კეკენაძემ. ბიძინა ივანიშვილის გადაწყვეტილებას „ქართული ოცნების“ ლიბერალური ფრთის ღია მხარდაჭერად აფასებს პარტია „თავისუფალი საქართველოს“ ლიდერი კახა კუკავა. მისი თქმით, ივანიშვილის გადაწყვეტილების გამოცხადება დაემთხვა სახელისუფლებო პარტიის ლიდერების შეკრებას, რომელზეც არ მიიწვიეს დავით ჭიჭინაძე, გედევან ფოფხაძე და ე.წ. „კონსერვატიული ფრთის“ სხვა წარმომადგენლები. კახა კუაკავამ მოუწოდა „მმართველი პარტიის იმ წევრებს, რომლებიც არიან ეროვნული, ტრადიციული ფასეულობების ერთგულნი, დატოვონ „ქართული ოცნება“ და გაემიჯნონ ანტისახელმწიფოებრივ, ფსევდოლიბერალურ კურსს.“ პარტია „დემოკრატიული საქართველოს“ ლიდერის, ნინო ბურჯანაძის შეფასებით, ბიძინა ივანიშვილი ქვეყანას კულუარებიდან მართავდა, ამიტომ მისი საჯაროდ გამოჩენა შესაძლოა, თავისთავად დადებითად შეფასდეს. „პრეზიდენტადაც თუ იყრის კენჭს, ცუდი არ იქნება“ - განუცხადა ჟურნალისტებს ნინო ბურჯანაძემ.