რუსეთის არმია აცხადებს, რომ სირიას მალე მიაწვდის საჰაერო თავდაცვის სისტემას, იმ საჰაერო დარტყმების ფონზე, რომელიც აშშ-მა, საფრანგეთმა და ბრიტანეთმა 14 აპრილს განახორციელეს სირიის სავარაუდოდ ქიმიური იარაღის ობიექტებზე. რუსეთის გაერთიანებული შტაბის გენერალმა, სერგეი რუდსკოიმ 25 აპრილს თქვა, მოსკოვი სირიას "მალე მიაწვდის სარაკეტო თავდაცვის ახალ სისტემებსო", თუმცა შეიარაღების ტიპი მას არ დაუკონკრეტებია. მისი განცხადების ფონია რუსეთის მედიაში გავრცელებული ცნობები, რომ მოსკოვი ფიქრობს სირიას მიჰყიდოს თავისი მაღალი ხარისხის, S-300 ტიპის ხმელეთ-ჰაერის სისტემები. დასავლეთის ქვეყნების მიერ განხორციელებული თავდასხმიდან მალე რუსეთის ოფიციალური პირები ამბობდნენ, რომ შესაძლოა გადასინჯონ პირობა, რომელიც მოსკოვმა ათწლეულის წინ დადო - რომ სირიას არ მიაწვდიდა S-300 სისტემას. დასავლეთის ქვეყნების საჰაერო დარტყმები წარმოადგენდა პასუხს სავარაუდოდ ქიმიური იარაღით განხორციელებულ თავდასხმაზე სირისი ქალაქ დოუმაში, რომელსაც 7 აპრილს 40-ზე მეტი ადამიანი ემსხვერპლა. დასავლელი მოკავშირეები ამ ინციდენტში პრეზიდენტ ბაშარ ალ-ასადის მთავრობას ადანაშაულებდნენ, რუსეთი და სირია კი უარყოფენ, რომ თავდასხმის უკან დამასკი იდგა. ისინი ასევე აცხადებენ, რომ ჩამოაგდეს ყველა დასავლური რაკეტა, რომელიც 14 აპრილის შემდეგ გაისროლეს - თუმცა პენტაგონი ამას უარყოფს.