სომხეთის პარლამენტის თავმჯდომარის, არა ბაბლოიანის ინფორმაციით, 1 მაისს გაიმართება სპეციალური სხდომა, რომელზეც განიხილება პრემიერ-მინისტრის არჩევის საკითხი. სომხეთის პრემიერ-მინისტრად 17 აპრილს არჩეული სერჟ სარგსიანი, თანამდებობიდან 23 აპრილს გადადგა მრავალათასიანი საპროტესტო აქციების შედეგად. 25 აპრილს, პარლამენტის ოპოზიციურმა ფრაქციამ, „ელკმა" პრემიერ-მინისტრობის კანდიდატად დაასახელა პარტიის, „სამოქალაქო შეთანხმების“ თავმჯდომარე, საპროტესტო მოძრაობის ლიდერი, ნიკოლ ფაშინიანი. პრემიერ-მინისტრის არჩევას სჭირდება სომხეთის პარლამენტის სულ მცირე 53 დეპუტატის მხარდაჭერა. 105-წევრიან პარლამენტში ოპოზიციურ ფრაქცია „ელკს“ 9 დეპუტატი ჰყავს. 31 დეპუტატია გაერთიანებული მეორე ოპოზიციურ ფრაქციაში „ცარუკიანი.“ 26 აპრილს, ნიკოლ ფაშინიანმა ფეისბუქზე დაწერა, რომ შეხვდა ფრაქციის ლიდერს, გაგიკ ცარუკიანს. ფაშინიანის ინფორმაციით, მათ განიხილეს სომხეთში შექმნილი პოლიტიკური ვითარების მოგვარების შესაძლებლობები და ამ საკითხზე მსჯელობას გააგრძელებენ. სომხეთის პარლამენტში ყველაზე მეტი, 58 დეპუტატი ჰყავს „რესპუბლიკურ პარტიას.“ მასთან კოალიციაში იყო პარტია „დაშნაკციუთუნის“ 7 დეპუტატი, რომლებმაც კოალიცია 25 აპრილს დატოვეს. 17 აპრილს სწორედ ამ ორმა პარტიამ დაუჭირა მხარი სომხეთის პრემიერ-მინისტრად ექს-პრეზიდენტ სერჟ სარგსიანის არჩევას.
