ოფიციალური ინფორმაციით, ერთი ადამიანი დაიღუპა მოსკოვში, სემიონოვსკის ქუჩაზე მდებარე სავაჭრო ცენტრში გაჩენილი ხანძრის შედეგად. რუსული საინფორმაციო სააგენტოები საგანგებო სიტუაციების სამსახურის წარმომადგენლებზე დაყრდნობით იუწყებიან, რომ გარდაცვლილი მამაკაცი ცენტრის თანამშრომელი იყო, რომელმაც ძლიერი კვამლის გამო ორიენტაცია დაკარგა და შენობიდან გასასვლელს ვეღარ მიაგნო. მოსკოვის საგანგებო სიტუაციათა სამსახურის ინფორმაციით, სავაჭრო ცენტრიდან ევაკუირებული იყო 600-მდე ადამიანი. ამავე სამსახურის ცნობით, დაშავდა 6 მეხანძრე. ერთის მდგომარეობა მძიმეა. ხანძრის გამომწვევი მიზეზი ჯერჯერობით უცნობია. 25 მარტს ხანძრი გაჩნდა რუსეთის ქალაქ კემეროვის სავაჭრო-გასართობ ცენტრშიც. ოფიციალური ინფორმაციით, დაიღუპა 64 ადამიანი, მათგან 41 ბავშვი.
