ეთნიკურმა სერბებმა კოსოვოს მთავრობა დატოვეს მაღალი რანგის სერბი ოფიციალური პირის გაძევების წინააღმდეგ პროტესტის ნიშნად და გზა გადაკეტეს ჩრდილოეთ კოსოვოში. სერბთა ეთნიკური უმცირესობის წარმომადგენელმა პოლიტიკოსებმა 27 მარტს ბელგრადში სერბიის პრეზიდენტ ალექსანდარ ვუჩიჩთან შეხვედრის შემდეგ გამოაცხადეს, რომ აღარ იმუშავებენ კოსოვოს მთავრობაში. წინა დღეს მარკო ჯურიჩი, რომელიც სერბიის მთავრობაში კოსოვოს საკითხთა უწყებას ხელმძღვანელობს, ცოტა ხნით დააკავეს კოსოვოს ქალაქ მიტროვიცაში. ადგილობრივი ხელისუფლება აცხადებს, რომ ის უკანონოდ ჩავიდა კოსოვოში. ის ჯერ პრიშტინაში გადაიყვანეს, შემდეგ კი კოსოვოდან გააძევეს. პოლიციამ ცრემლმდენი გაზი გამოიყენა ჯურიჩის დაკავების გასაპროტესტებლად შეკრებილი ეთნიკური სერბების წინააღმდეგ. ინციდენტმა გაამწვავა უთანხმოება სერბიასა და მის ყოფილ პროვინციას შორის. კოსოვომ 2008 წელს გამოაცხადა დამოუკიდებლობა, რომელსაც უკვე 100-ზე მეტი ქვეყანა ცნობს, მაგრამ არ აღიარებს თვითონ სერბია.
