სრულიად საქართველოს კათოლიკოს-პატრიარქის თანამოსაყდრე, მეუფე შიო მუჯირი იმყოფებოდა სოფელ წილკანში, სადაც პირადად მიუსამძიმრა ოკუპირებულ ცხინვალის რეგიონში გარდაცვლილი არჩილ ტატუნაშვილის ოჯახს. „ვართ ძალიან შეშფოთებულები, რომ ამდენხანს გაჭიანურდა ცხედრის გადმოსვენება, ოჯახს არ ეძლევა საშუალება რომ ქრისტიანულად დაკრძალოს და ეს რა თქმა უნდა, ტარგედიაა“ - განუცხადა 12 მარტს, ჟურნალისტებს მეუფე შიო მუჯირმა. მან სახელმწიფოს უდიდესი ჭრილობა უწოდა ცხინვალის რეგიონს და აფხაზეთს. შეკითხვას, ხომ არ ჰქონდა საქართველოს საპატრიარქოს კონტაქტი რუსეთის საპატრიარქოსთან მას შემდეგ, რაც მარტის დასაწისში, რუსეთის პატრიარქმა წერილობით უპასუხა სრულიად საქართველოს კათოლიკოს-პატრიარქის მიმართვას, მეუფე შიომ უპასუხა, რომ კონტაქტი აღარ ყოფილა. „მაშინ ითქვა, რომ უახლოეს ხანში მოხდებოდა ცხედრის დაბრუნება, მაგრამ სამწუხაროდ, ეს არ ხერხდება“ - განაცხადა პატრიარქის თანამოსაყრდემ. 4 მარტს, საპატრიარქომ განაცხადა, რომ სრულიად საქართველოს კათოლიკოს-პატრიარქის, ილია მეორის თხოვნით, რუსეთის პატრიარქი კირილე ჩაერთო არჩილ ტატუნაშვილის ცხედრის ოჯახისთვის გადაცემის საკითხში და ცხედარს „წითელი ჯვარი“ ჩამოასვენებს. 6 მარტს, საპატრიარქომ რუსეთის პატრიარქისგან მიღებულ წერილთან ერთად გამოაქვეყნა ცნობაც, რომლის თანახმად, არჩილ ტატუნაშვილის ცხედარს ოჯახს 7 ან 8 მარტს გადასცემდნენ.