საქართველოს წყალბურთის ნაკრები ევროპის 2018 წლის ჩემპიონატის ჯგუფურ ეტაპზე გერმანიას, იტალიასა და უნგრეთს დაუპირისპირდება. ევროპირველობის წილისყრა დღეს გაიმართა ბარსელონაში და ფინალურ ეტაპზე გასული 16 ქვეყნის ნაკრები 4 ჯგუფში გადანაწილდა. საქართველო "ა" ჯგუფში მოხვდა. "ბ" ჯგუფში ითამაშებენ მონტენეგრო, მალტა, საფრანგეთი და ესპანეთი, „ცე“ ჯგუფში - ხორვატია, თურქეთი, ჰოლანდია და საბერძნეთი, ხოლო "დ" ჯგუფში - რუსეთი, სერბია, სლოვაკეთი და რუმინეთი. საქართველოს ნაკრები ევროპირველობაზე ზედიზედ მესამედ გავიდა. ევროდებიუტი შედგა 2014 წელს და ქართველებმა ბოლო - მე-12 - ადგილი დაიკავეს, 2016 წელს კი 16 მონაწილე ნაკრებს შორის მე-14 ადგილზე გავიდნენ. ქართველი წყალბურთელები მომავალ ჩემპიონატს უნგრელებთან შეხვედრით გახსნიან. შეჯიბრებას ბარსელონა უმასპინძლებს 14-28 ივლისს.
