აშშ-ის ცენტრალური სადაზვერვო სააგენტოს დირექტორი მაიკ პომპეო ვარაუდობს, რომ ნოემბერში რუსეთი შეეცდება ჩაერიოს აშშ-ის შუალედურ არჩევნებში. ბრიტანეთის სამაუწყებლო კორპორაცია ბიბისისთან ინტერვიუში, პომპეომ ახსენა კრემლის ძალისხმევა, გავლენა მოახდინოს პოლიტიკურ გადაწყვეტილებებზე დასავლეთის ქვეყნებში და აღნიშნა, რომ არ შეუმჩნევია ამ ძალისხმევის მნიშვნელოვნად შესუსტება. შეკითხვას, შეეცდება თუ არა მოსკოვი გავლენა მოახდინოს შუალედურ არჩევნებზე, ცენტრალური სადაზვერვო სააგენტოს დირექტორმა უპასუხა: „რასაკვირველია. ყველანაირად მოველი, რომ გააგრძელებენ მცდელობას და ამას გააკეთებენ“. როგორც აშშ-ის დაზვერვის უწყებებმა 2017 წლის იანვარში გამოაცხადეს, მათ დადგენილი აქვთ, რომ რუსეთის პრეზიდენტმა ვლადიმირ პუტინმა პირადად გასცა დავალება ჰაკერულ-პროპაგანდისტული კამპანიით აშშ-ის საპრეზიდენტო არჩევნებზე გავლენის მოხდენის შესახებ. აშშ-ის იუსტიციის სამინისტროს სპეციალური პროკურორი რობერტ მიულერი და კონგრესის სამი კომისია ცალ-ცალკე აწარმოებენ გამოძიებას აშშ-ის საარჩევნო კამპანიაში რუსეთის ჩარევის ბრალდებასთან დაკავშირებით.
