«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը – Պարո՛ն Աղազարյան, ինչպե՞ս եք գնահատում ձեր թիմակից Խաչատուր Սուքիասյանի այսօրվա ելույթը խորհրդարանի ամբիոնից, որից մի հատված, ձեր թույլտվությամբ, մեջբերեմ. «Եվ եթե մենք գնանք տարիներ հետ և տեսնենք, թե ՀՀ-ն ովքեր են ղեկավարել, ինչ ձևով են ղեկավարել, և տեսնենք, թե նրանք ինչ ձևով են […]
The post Իրենք ընտրություններով չեն ուզում գալ, որովհետև չեն կարող, իրենց միակ տարբերակը հեղաշրջումն է. Հովիկ Աղազարյան first appeared on MediaLab Newsroom-Laboratory.
«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը
– Պարո՛ն Աղազարյան, ինչպե՞ս եք գնահատում ձեր թիմակից Խաչատուր Սուքիասյանի այսօրվա ելույթը խորհրդարանի ամբիոնից, որից մի հատված, ձեր թույլտվությամբ, մեջբերեմ. «Եվ եթե մենք գնանք տարիներ հետ և տեսնենք, թե ՀՀ-ն ովքեր են ղեկավարել, ինչ ձևով են ղեկավարել, և տեսնենք, թե նրանք ինչ ձևով են վերաբերվում այն մարդկանց, ովքեր մի օտար երկրի անուն էին տալիս կամ մի օտար երկրի հետ հարաբերություն էին ունենում։ Շատ վատ էին վարվում՝ կամ այդ մարդիկ բանտում էին հայտնվում, կամ մահանում էին, կամ էլ ունեզրկվում էին։ Հիմա ձեզ ասում եմ՝ եթե դուք ձեր չափը չճանաչեք և խանգարեք Հայաստանի Հանրապետության զարգացմանը, ձեզ հետ նույն գործիքներով կխոսենք, դուք պետք է ձեր չափը լավ ճանաչեք»։
– Չեմ կարծում, որ կոռեկտ է իմ գործընկերոջ ելույթը քննարկելը։
– Կարծիքներ են հնչում, որ սա ընդդիմությանն ուղղված ուղիղ սպառնալիք է, դուք սպառնալիք չե՞ք տեսել պարոն Սուքիասյանի ելույթում։
– Սպառնալիքներ չեմ տեսել իհարկե, բայց պարոն Սուքիասյանի ելույթը մոտավորապես համարժեք պատասխան էր այն ելույթներին, որոնք մեր ընդդիմադիր գործընկերներն ունենում են, ասենք, ստահոդ ելույթներով են հանդես գալիս։ Այդ կարգի մտքերին, հայտարարություններին կարող է պարոն Սուքիասյանը մի փոքր էմոցիոնալ ֆոնով արձագանքել։ Այնպես չէ, որ պարոն Սուքիասյանի ելույթը տարբերվում է իր հռետորիկայով ու էմոցիոնալ դաշտով պարոն Խաչատրյանի, Արծվիկ Մինասյանի, Գառնիկ Դանիելյանի ելույթից, որն ամբիոնից գոռում էր մեր վրա։
– Պարոն Դանիելյանի ելույթի մե՞ջ եք սպառնալիքներ տեսել։
– Ես պարոն Սուքիասյանի ելույթում էլ սպառնալիքներ չեմ տեսել, որովհետև նա քաղաքային պատգամավոր է, ճիշտ է, շատ մեծ կարողությունների տեր մեր հայրենակիցն է, բայց նա շարքային պատգամավոր է, ու իրա ելույթը պետք է դիտարկել քաղաքական ելույթ, ոչ թե սպառնալիք, որովհետև նա չունի այդ հնարավորությունը, նա ո՛չ ոստիկանապետ է, ո՛չ դատախազ է, որ իր խոսքերը դիտարկվեն որպես սպառնալիք։ Դա պետք է դիտարկել քաղաքական խոսք՝ էմոցիաներով համեմված։
– Դե, ասում են, որ իշխանության ներկայացուցիչ եք, ու ձեր խոսքը կարող է ուղղորդող լինել իրավապահ մարմինների համար, ու նրանք սկսեն անել այն, ինչ հայտարարում եք, օրինակ՝ ունեզրկման գործընթաց սկսեն այս կամ այն ընդդիմադիրի նկատմամբ, պարո՛ն Աղազարյան։
– Ես իհարկե լավ չեմ հիշում, թե ունեզրկումն ինչ կոնտեքստում ասվեց, բայց մենք նման տերմինալոգիա չունենք, մեզ մոտ կա ապօրինի գույքի բռնագանձման մասին օրենք, որը վերաբերում է ոչ միայն ընդդիմությանը, այլ վերաբերում է նաև բոլորին, այդ թվում նաև՝ իշխանությանը։
– Հաշվի առնելով ձեր թիմակիցների վերջին օրերի ելույթները, ընդդիմությունն ասում է, որ սրանով դուք ցույց եք տալիս ձեր վախերը, մտահոգությունները՝ այս շարժմամբ պայմանավորված։ Ձեր թիմն ունի՞ վախեր կամ մտահոգություններ Բագրատ Արքեպիսկոպոսի գլխավորած շարժումից։
– Չէ՛, վախեր չկան բացարձակապես, մի տեսակ ուրիշ զգացողություն կա, որ ամեն ինչն արժեզրկվում է փաստորեն, ամեն գնով իշխանության գալու ձգտումն իր ճանապարհին շատ-շատ բաներ ոչնչացնում է, և ակնհայտ է, թե ոնց կվերջանա այս շարժումը, որովհետև այն սցենարը, որ մշակվել էր, ընդհանուր առմամբ նորմալ էր մշակվել, բայց ցանկալի արդյունքը չտվեց:
Հիմա շատ դժվար կլինի հասարակության լայն շրջաններին կոնսոլիդացնել ու գալ իշխանափոխության այն ձևով, որով ուզում են այս շարժման իսկական շահառուները։ Իրենք ընտրություններով չեն ուզում գալ, որովհետև գիտեն, որ այդ ճանապարհով չեն կարող իշխանություն վերցնել, դրա համար իրենց միակ տարբերակը հեղաշրջումն է, հիմա թե որքա՛ն արյունով, դա այլ հարց է, բայց այդ հեղաշրջմանը ժողովուրդը բացարձակապես չի աջակցում։
– Այսինքն՝ կարծում եք, որ շարժումը չի՞ հաջողի։
– Դե եթե մի 15-20 տարի պայքարեն, կարծում եմ, որ կհաջողեն, չնայած այդ ժամանակ Նիկոլ Փաշինյանը կարող է վարչապետ չլինի, բայց հիմա չեն հաջողի։
– Խոսեցիք արժեզրկման մասին, կխնդրեմ ասեք, թե ի՞նչն է արժեզրկում այս շարժումը։
– Արժեզրկվել են բոլոր բացասական ու դրական բառերը, արժեզրկվել է «դավաճան» բառը, «հերոս» բառը, արժեզրկվում է «հայրենիք» բառը, այդ ամենն արժեզրկվում է, արժեզրկվել է նույնիսկ հայհոյանքը, արդեն այն աստիճանի անիմաստ տեղեր են օգտագործվում հայհոյանքները, որ ողջ հասարակությունն իմունիտետ է ձեռք բերել դրա նկատմամբ։ «Դավաճան» բառն է արժեզրկվել, երբ որ դու ինչ-որ մեկին ասում ես՝ դու դավաճան ես, հաջորդ պահին պետք է դիմես ֆիզիկական գործողության, այ, որպեսզի դու ստիպված չլինես դիմել ֆիզիկական գործողության, պետք է ասես՝ ձեր քայլը դավաճանական է, բայց եթե դու ասում ես՝ դու դավաճան ես, ու քո կյանքը չես տալիս, որ ինձ ոչնչացնես, կներես, ուրեմն դա անլուրջ է։
– Պարո՛ն Աղազարյան, այսինքն՝ կարծում եք, որ ընդդիմությունը պետք է նման քայլի դիմե՞ր, երբ իշխանությանը նման որակում էր տալիս։
– Բոլոր նրանք, ովքեր ինձ համարում են դավաճան ու հաջորդ պահին ինձ չեն սպանում, դավաճանն իրենք են։
– Ընդդիմությունն էլ ասում է, որ ամեն ինչի արժեզրկումը սկսել է ձեր քաղաքական թիմը՝ 2018-ից սկսած։
– Բնականաբար ես համաձայն չեմ իրենց հետ, բայց եթե իրենք գտնում են, որ այդպես է, իրենք պետք է այդ ամենը հասցնեն ժողովրդին ու կատարեն Սահմանադրությամբ ու օրենքներով նախատեսված ճանապարհով իշխանափոխություն: Թող անեն այդ քայլերը, ո՞վ է իրենց խանգարում իրացնել իրենց սահմանադրական իրավունքը։
– Ասում են՝ իշխանությունն է խանգարում, երբ խաղաղ ցուցարարների դիմաց կարմիրբերետավորների պատ է կանգնեցնում։
– Բա բերետավորներն ինչի՞ համար են, նրանց կարո՞ղ է մենք ենք հորինել։ Ոստիկանական ուժերը կոչված են հասարակական կարգ ու կանոնը պաշտպանելու համար, ու ես գտնում եմ, որ իրենք շատ բարձր մակարդակով են իրականացնում իրենց պարտականությունը։ Ասում են՝ անվտանգության աշխատակիցներով եք ման գալիս, հա՛, խանգարում ենք իրենց իրավունքը հոկտեմբերի 27 իրականացնելու համար, դժվարացնում ենք իրենց գործը։ Թող այդ բոլոր մեղադրանքները, որ հնչեցնում են մեր հասցեին, հասցնեն մարդկանց օրինական եղանակով, թող անեն դա և հասնեն իշխանափոխության, խնդրեմ։
Քրիստինե Աղաբեկյան
MediaLab.am
The post Իրենք ընտրություններով չեն ուզում գալ, որովհետև չեն կարող, իրենց միակ տարբերակը հեղաշրջումն է. Հովիկ Աղազարյան first appeared on MediaLab Newsroom-Laboratory.
