Դատախազությունը պահանջում է Վիգեն Սարգսյանից բռնագանձել ԱՄՆ-ում բնակելի տարածքը, Երևանի կենտրոնում անշարժ գույքը և դրամական միջոցներ. «Ազատություն»

Հակակոռուպցիոն դատարանը մայիսի 15-ին վարույթ է ընդունել Գլխավոր դատախազության՝ առերևույթ ապօրինի ծագում ունեցող գույքի բռնագանձման վերաբերյալ հերթական հայցադիմումը:Այս մասին հայտնում է «Ազատություն»-ը:

Պաշտոնական հաղորդագրության համաձայն՝ Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ ՀՀ պաշտպանության նախկին նախարար Վիգեն Սարգսյանից և նրան փոխկապակցված անձից բռնագանձել՝

• 1 անշարժ գույք Երևանի կենտրոնում, իսկ անհնարինության դեպքում՝ գույքի միջին շուկայական արժեքը՝ 181 մլն 125 հազար դրամ.

• ԱՄՆ Մասաչուսեթս նահանգում գտնվող բնակելի տարածքը, իսկ անհնարինության դեպքում՝ գույքի ձեռքբերման արժեքը՝ 2 մլն 50 հազար ԱՄՆ դոլարին համարժեք 940 մլն 909 հազար դրամ.

• 255 մլն 454 հազար դրամ՝ որպես ապօրինի դրամական միջոցների մնացորդ.

• 172 մլն 486 հազար դրամ, որը, ըստ Դատախազության, չի հիմնավորվում անձի օրինական եկամուտներով, ունի ապօրինի ծագում և հնարավոր չէ բռնագանձել, քանի որ 2004-2022 թվականների ընթացքում փոխանցվել է բարեխիղճ ձեռքբերողի և/կամ հնարավոր չէ նույնականացնել՝ բռնագանձումը տարածելով նաև համատեղ կյանքի ընթացքում Լ.Գ.-ի անվամբ առևտրային բանկերում առկա դրամական միջոցների, գույքերի վրա:

Մեկ այլ հաղորդագրությամբ Դատախազությունը տեղեկացնում է, որ ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ Արարատի նախկին մարզպետ Արամայիս Գրիգորյանից և նրան փոխկապակցված անձանցից բռնագանձել 46 անշարժ գույք և շուրջ 350 մլն դրամ, Հակակոռուպցիոն դատարանը մայիսի 16-ին վարույթ է ընդունել հայցադիմումը:

The post Դատախազությունը պահանջում է Վիգեն Սարգսյանից բռնագանձել ԱՄՆ-ում բնակելի տարածքը, Երևանի կենտրոնում անշարժ գույքը և դրամական միջոցներ. «Ազատություն» first appeared on MediaLab Newsroom-Laboratory.