«Մեդիալաբի» հարցերին պատասխանում է Հայաստանյայց Առաքելական Եկեղեցու Շիրակի թեմի առաջնորդ Միքայել արքեպիսկոպոս Աջապահյանը – Սրբազա՛ն, իշխանության ներկայացուցիչները պնդում են, որ ինչքան երկար շարունակվի «Տավուշը հանուն հայրենիքի» շարժումը, այնքան ավելի կվտանգվի Եկեղեցու վարկանիշը, այն ավելի կնվազի շարժման անհաջողության պարագայում, իսկ որ շարժումը չի հաջողելու՝ նրանք վստահ են։ – Թող իրենք իրենց վարկանիշի մասին մտածեն, մեր վարկանիշի […]
The post Եթե մենք օտար պետության գործակալ ենք, բացահայտեք, ձերբակալեք, գրիչն էլ է ձեր ձեռքը, թուղթն էլ, կնիքն էլ. Արքեպիսկոպոս Աջապահյան first appeared on MediaLab Newsroom-Laboratory.
«Մեդիալաբի» հարցերին պատասխանում է Հայաստանյայց Առաքելական Եկեղեցու Շիրակի թեմի առաջնորդ Միքայել արքեպիսկոպոս Աջապահյանը
– Սրբազա՛ն, իշխանության ներկայացուցիչները պնդում են, որ ինչքան երկար շարունակվի «Տավուշը հանուն հայրենիքի» շարժումը, այնքան ավելի կվտանգվի Եկեղեցու վարկանիշը, այն ավելի կնվազի շարժման անհաջողության պարագայում, իսկ որ շարժումը չի հաջողելու՝ նրանք վստահ են։
– Թող իրենք իրենց վարկանիշի մասին մտածեն, մեր վարկանիշի մասին մենք կմտածենք։ Նմանատիպ թեզերը նշանակում են, որ արդեն որոշակի վախեր ունեն, դրա համար էլ փորձում են նմանատիպ հայտարարություններով մեզ հետ պահել հետագա քայլերից, թեև մենք ընդամենը Եկեղեցու զորության 10-15 %-ն ենք օգտագործել մինչև այսօր։
– Այսինքն՝ կարող եք ավելին անել, չե՞ք անում։
– Չենք ուզում ամբողջական մասնակցություն ունենալ այս գործընթացին, որովհետև այդպիսի նպատակադրում չի եղել ի սկզբանե, եղել է տավուշյան գործընթաց, որը ղեկավարել է Տավուշի թեմի առաջնորդը, հասել այս կետին։ Հիմա, եթե իրենք մեզ սադրում են, որպեսզի մենք ամբողջական միանանք, կարող ենք և ամբողջական միանալ, ի՞նչ խնդիր կա, բայց Տավուշի Սրբազանն արդեն իր կարողությամբ լրիվ բավարար է իրենց հետ, ի՞նչ պետք է ամբողջականը, թնդանոթով հո չե՞նք սպանելու։
– Սրբազա՛ն, Բագրատ Սրբազանին մեղադրում են նրա համար, որ ի սկզբանե նա հայտարարել էր, թե սա չակնկալիքների պայքար էր, հիմա հասել է Երևան և ուզում է վարչապետ դառնալ։
– Չի ուզում վարչապետ դառնալ, բայց օդում կախված է այդ պահանջը, ու ինքն այդ պահանջի դիմաց, այո՛, պատրաստակամություն է հայտնում, թերևս, եթե Սահմանադրությունը թույլ տա, այդ պահանջին ընդառաջ գնալ։ Ինքը չի ուզում վարչապետ դառնալ, և մեզանից որևէ մեկն էլ չի ուզում, ինքն ասել է, չէ՞, որ ինքն ավելի բարձր պաշտոն է զբաղեցնում, քան վարչապետի պաշտոնն է։ Աստծուց տրված իշխանությունը նա պատրաստ է փոխարինել մարդկանց կողմից տրված իշխանությամբ միայն երկրի հոգսերը հոգալու համար, այլ ոչ թե իր ամբիցիաները բավարարելու համար, սա շատ պարզ է, կարծեմ թե։
– Դառնալով Եկեղեցու ունեցած վարկանիշի թեմային՝ ինչո՞ւ են նման թեզեր օրակարգ նետվում՝ ըստ Ձեզ։
– Եկեղեցին իրենց ուղեղում ցածր վարկանիշ ունի, և իրենք կարծում են, թե իրապես ցածր է վարկանիշը, բայց այդպես չէ։ Եկեղեցին շատ էլ լավ վարկանիշ ունի, բարձր վարկանիշ չունենար՝ մեկ արքեպիսկոպոս այսքան մարդ չէր հավաքի։
– Իսկ շարժման հաջողելու կամ չհաջողելու առնչությամբ ի՞նչ կարծիք ունեք։
– Աղոթում ենք հաջողության համար, մաղթում ենք, որ հաջողի, բայց պետք է հասարակությունը ոտքի կանգնի, որպեսզի շարժումը հաջողի, այլապես մենք ինքնին, ուզում եմ, որ սա պարզ հասկանաք, հանուն Եկեղեցու ինչ-որ շահերի համար չէ, որ ուզում ենք այս փոփոխությունը։ Եթե հասարակության մեջ կա պահանջ, Բագրատ Սրբազանը հայտ ներկայացրել է այդ պահանջը բավարարելու Եկեղեցու ու եկեղեցականի ուժականությամբ, եթե հասարակության մեջ չձևավորվի այդ պահանջը, Եկեղեցին որևէ մեղք չունի, Եկեղեցին իր համար առանձին օրակարգ չունի, ինքն ուզում է սպասարկել հասարակության օրակարգը։
– Դեռ առաջին օրվանից Եկեղեցուն կապեցին Ռուսաստանի, նախկին նախագահների հետ, ըստ Ձեզ․․․
– Դա հերթական ապատեղեկատվությունն է, հերթական սուտն ու կեղծիքը իշխանության կողմից, եթե մենք օտար պետության գործակալ ենք՝ բացահայտեք, ձերբակալեք, ինչի՞ մասին է խոսքը, գրիչն էլ է ձեր ձեռքը, թուղթն էլ, կնիքն էլ։
– Ըստ Ձեզ՝ հաջողվեց այդ սև փիարով մարդկանց վանել շարժմանը միանալուց։
– Ո՛չ, ո՛չ, չի հաջողվել։
– Իսկ մարդկանց թիվը բավարար համարո՞ւմ եք, Սրբազա՛ն։
– Ո՛չ, բավարար չեմ համարում, բայց դա իշխանության ուժի մասին չի խոսում, այլ՝ հասարակության անտարբերության ու անփութության, որոշ խավերի, իհարկե, ու որոշ ֆոբիաների մասին է խոսում՝ այսինչը հանկարծ չգա, նախկինը չգա։ Այս ֆոբիաների մասին է խոսում:
Այս իշխանությունն այսօր ոչ մի ուժ չունի՝ բացի ռեպրեսիվ մեխանիզմներից ու իրենց աթոռներից, որոնք զբաղեցնում են, ուրիշ ոչ մի ուժ չունի, սպառված, ձախողված, խայտառակված է։ Եթե այս իշխանության վախը մեծանա, ապա ռեպրեսիաները կարող է մեծացնել, որովհետև վախկոտներից բաղկացած իշխանությունն ամեն գնով փորձելու է կանխել փոփոխությունները, որպեսզի հանկարծ իրենց վախերն իրականություն չդառնան։
Քրիստինե Աղաբեկյան
MediaLab.am
The post Եթե մենք օտար պետության գործակալ ենք, բացահայտեք, ձերբակալեք, գրիչն էլ է ձեր ձեռքը, թուղթն էլ, կնիքն էլ. Արքեպիսկոպոս Աջապահյան first appeared on MediaLab Newsroom-Laboratory.
