Ավելի քան 700 մարդ ձերբակալվել է ԱՄՆ-ում պաղեստինցիներին աջակցող ուսանողական ցույցերի ժամանակ, հաշվարկել է The New York Times-ը։
Հրատարակության համաձայն՝ ուսանողական ակտիվության ալիքը հրահրել է անցած շաբաթ Նյու Յորքի Կոլումբիայի համալսարանի տարածքում վրանային ճամբարը ցրելու ժամանակ ոստիկանության կողմից 108 մարդու ձերբակալությունը։
Էմերսոն Քոլեջ համալսարանի (Բոստոն, Մասաչուսեթս) տարածքում վրանային ճամբարը ցրելու ժամանակ ձերբակալվել է 118 մարդ, Հյուսիսարևելյան համալսարանում (Բոստոն)՝ 102, Լոս Անջելեսի Հարավային Կալիֆոռնիայի համալսարանում՝ 93։ Եվս տասնյակ ուսանողներ ձերբակալվել են Տեխասի համալսարանում, Ինդիանայի համալսարանում (Բլումինգթոն), Էմորիի համալսարանում (Ատլանտա, Ջորջիա) և Արիզոնայի պետական համալսարանում։
Ձերբակալություններ են տեղի ունեցել նաև Փրինսթոնում, Յեյլում, Նյու Յորքի համալսարանում, Մինեսոտայի և Օհայոյի պետական համալսարանում:
Իսրայելի և ՀԱՄԱՍ-ի միջև պատերազմը սկսվել է 2023 թվականի հոկտեմբերի 7-ին պաղեստինյան շարժման կողմից Իսրայելի տարածքի վրա հարձակումից։ Զոհվել է 1,2 հազար իսրայելցի, վիրավորվել՝ 5,4 հազարը, պատանդ են վերցվել ավելի քան 200 իսրայելցիներ և օտարերկրացիներ։ Իսրայելը պատասխան ռազմական գործողություն է իրականացնում, որի հետևանքով զոհվել է ավելի քան 34 հազար պաղեստինցի, վիրավորվել ավելի քան 77 հազար մարդ։ԱՄՆ-ն աջակցում է Իսրայելին այս պատերազմում, սակայն դեմ է Գազայի հատվածում գործողության հետ կապված որոշ որոշումների։ Երկրում տեղի են ունենում ինչպես իսրայելամետ, այնպես էլ պաղեստինամետ ցույցեր:
