Մենք համախմբվելու ենք, ոտքի ենք կանգնելու ու դուրս գանք այս վիճակից։ Այս մասին լրագրողների հետ զրույցում ասաց «Հայաստան» խմբակցության պատգամավոր Իշխան Սաղաթելյանը` նախքան դեպի Եռաբլուր ջահերով լուռ երթի մեկնարկը։
Անդրադառնալով 2020 թվականի 44–օրյա պատերազմի նախօրեին դեպի Եռաբլուր կազմակերպված երթին Իշխան Սաղաթելյանն ասաց, որ այսօրվա հիշատակի երթն ունի համախմբվելու խորհուրդ։
«Այո, մենք ոտքի ենք կանգնելու, մենք տեր ենք մեր երկրին, հայրենիքին և մեր սուրբ նահատակների թափած արյունը՝ հանուն հայրենիքի, իզուր չի անցնելու, իրենց գործը շարունակելու ենք»,- նշեց Սաղաթելյանը:
Ինչ վերաբերում է քաղաքական իրավիճակին, ապա Իշխան Սաղաթելյանն ասաց, որ երկրում ստեղծված ճգնաժամը շարունակում է մնալ չհաղթահարված, որովհետև երկիրն այդ վիճակին հասցրած իշխանությունները մնում են իշխանության:
«Մեր երկիրը վտանգի տակ է, Հայաստանում սպառնացող վտանգներն օր օրի խորանում են, իսկ օրվա իշխանություններն այդ վտանգներն ի վիճակի չէ չեզոքացնել: Պետք է կանխենք Հայաստանի թրքացումը, պարտավոր ենք հաղթահարել այս ճգնաժամը, իսկ այդ ճանապարհին կա մեկ խոչընդոտ՝ այսօրվա իշխանությունը»,- նշեց Սաղաթելյանը։
Նա նաև ասաց, որ հետևելով օրվա խորհրդին, քաղաքական բնույթի հարցերին չի ցանկանում պատասխանել։