«Օրերս Արագած համայնք կատարած այցի ընթացքում՝ քաղաքացիների հետ հանդիպման ժամանակ Փաշինյանը խոսել բուհերում առկա խնդիրների մասին և առաջարկել իր լուծումները: Նիկոլ Փաշինյանի խոսքով՝ Երևանի բուհերի շենքերը պետք է վաճառել, ապա այդ փողերով կառուցել նոր ակադեմիական քաղաք: Այս մասին «Իրավունքը» զրուցեց բանաստեղծ, գրականագետ, բանասիրական գիտությունների դոկտոր, ԵՊՀ դասախոս Հենրի Էդոյանի հետ:
-Պարո՛ն Էդոյան, երկրի վարչապետը հայտարարում է, որ բուհերի շենքերը պետք է վաճառել, ապա ակադեմիական քաղաք կառուցել: Որպես ԵՊՀ դասախոս՝ ինչ անուն կտաք այս ամենին:
-Պարզապես անհեթեթություն է: Այդպիսի բան չի կարող լինել: Այդ խոսքերին այդքան լուրջ մի վերաբերվեք: Երևանի պետական համալսարանը մի ամբողջ բանակ է, ո՞նց կարող ես այն վաճառել: Խոսում են նոր ակադեմիական քաղաք կառուցելու մասին, երբ կկառուցեն, այն ժամանակ էլ թող այդ մասին խոսեն: Երևանի պետական համալսարանի շենքը մշակութային լուրջ արժեք է: Ուզում են բիզնես կենտրոններ կառուցել, թող կառուցեն, բայց ոչ բուհերի հաշվին, ի՞նչ կապ ունի համալսարանի շենքն այդ ամենի հետ: Երևանի պետական համալսարանի մասնաշենքի հիմքը մենք ենք դրել դեռ ուսանող տարիներից: Անկեղծ ասած՝ այս հայտարարությունն ուղեղիս մեջ չի տեղավորվում:
-Մենք անընդհատ անցյալով ենք խոսում մշակութային կյանքի մասին: Ի վերջո, Հայաստանում այսօր կա՞ մշակութային կյանք:
-Մշակութային կյանք միշտ էլ կա, սակայն Հայաստանն այժմ մշակութային երկրի չէ:
-Իսկ այդքան հարուստ մշակութային ժառանգություն ունեցող երկիրն ինչո՞ւ այսօր մշակութային չէ:
-Այնքան հարցեր կան դրա հետ կապված, այսպես միանգամից չեմ կարող ասել: ժամանակներն այնպիսին դարձան, որ մշակույթը դարձավ ավելորդ բան»,-գրում է թերթը:
Նյութն ամբողջությամբ կարդացեք թերթի այսօրվա համարում:
