Ձվի գինը Զատկին ընդառաջ օր օրի թանկանում է մի քանի դրամով։ 50–60 դրամանոց հավկիթներն ամիսներ առաջ նախ դարձան 70-80 դրամ, այսօր էլ մեկ հավկիթի գինը խանութներում դարձել է 110–ից 120 դրամ։
«Նախորդ տարվա փետրվարի համեմատ 53 տոկոս ձվերի գնի աճ է նկատվել։ Սա էապես մտահոգիչ է։ Եվ պահանջարկը չէ, որ այստեղ մեծ դեր ունի։ Կարծում եմ՝ էլի գործ ունենք մենաշնորհացման ակտիվացման հետ և դա ակնհայտ է», – Tert.am–ի հետ զրույցում ասաց տնտեսագետ Թադևոս Ավետիսյանը։
Քաղաքացիները հավկիթի գնային փոփոխությունները նկատում են ամեն օր։ Երեկ գնել են այլ գնով, այսօր արդեն այլ գին է։ Սպառողները պնդում են՝ միայն հավկիթի գինը չէ, որ աճել է. առաջին անհրաժեշտության բոլոր մթերքները թանկացել են մի քանի անգամ։
«Անզեն աչքով արդեն նկատելի են դեֆիցիտային երևույթներ, որոնք պետական կառավարման ձախողման հետևանք են։ Պաշտոնյաներից լսում ենք հայտարարություններ, թե պետք չէ խուճապի մատնվել, բայց մարդիկ խուճապի չեն մատնվում, պարզապես ուզում են Զատիկին տանը մի քանի ներկած ձու ունենալ ու ընտանիքի անդամների հետ տոնել այդ օրը», – ասում է տնտեսագետը։
Թե ինչու է թանկացել ձուն ու ինչ պետք է անել այդ ուղղությամբ, Տնտեսական մրցակցության պաշտպանության պետական հանձնաժողովը հստակ որևէ բան չի ասում, դեռ քննարկում են ձվի շուկայում ստեղծված իրավիճակը, ուսումնասիրում բոլոր հնարավոր տարբերակները, խոշոր առևտրային ցանցերում իրականացնում ամենօրյա մշտադիտարկումներ։ Բայց մինչև ՏՄՊՊՀ–ն մշտադիտարկում է անում, խանութներում ձուն և առաջին անհրաժեշտության մյուս մթերքներն ավելի թանկ հաճույք են դառնում սպառողների համար։
Մանրամասները՝ տեսանյութում։